යුද හමුදා බුද්ධි අංශ මේජර් චන්දන ප්‍රදීප් සුරසේන බොරු පැමිණිල්ක් කෙළේ ද නැද්ද යන්න සොයා බලා ඔහුට විරුද්ධව ක්‍රියාකරන්නේ ද, නැද්ද යන්න ලබන සඳුදාට දැනුම් දෙන්නැයි කොළඹ කොටුව මහේස්ත්‍රාත් කණ්ෂ්ක විජේරත්න මහතා කොම්පඤ්ඤවීදිය පොලිසියට නියෝග කෙළේය. මහේස්ත්‍රාත් එම නියෝගය දුන්නේ ඇමැති මර්වින් ගේ පුත් මාලක හා හිටපු ඇමැති මනෝ විජේරත්නගේ පුත් රෙහාන්, ජයික් හිල්ටන් හෝටලයේ දී පහර දී පිස්තෝලය උදුරාගත් බව මුලින් පවසා පසුව පහර නොදුන් බව උසාවියට ප්‍රකාශ කළ නිසාය. මාලක හා රෙහාන් රිමාන්ඩ් බාරයේ සිට උසාවියේ පෙනී සිටි අතර රුපියල් ලක්ෂය දහය බැගින් ශරීර ඇප හා රුපියල් පනස් දහසක මුදල් මත ඔවුහු මුදා හරිනු ලැබූහ. මේජර් සුරසේන පැමිණ සිටියේය. මෙම නඩුව ගැන තමාගේ උනන්දුවක් නැතැයි පැවැසූ මහේස්ත්‍රත්වයා එහෙත් මෙවැනි දේ සිදුවනවාට තමා අකමැති බව ද පැවැසීය. මහේස්ත්‍රාත්වරයා මේජර්ගෙන් දිගින් දිගටම ප්‍රශ්න කෙළේය. මහේස්ත්‍රාත් - ඔබ සේවය කරන්නේ කොහේද? මේජර් - යුද හමුදා බුද්ධි අංශයේ දකුණ ප්‍රදේශයේ මහේස්ත්‍රාත් - තවත් තැන්වල සේවය කළාද? මේජර් - ඔව් යුද සමයේ ත්‍රිකුණාමලයේත් යාපනයෙත් සේවය කළා මහේස්ත්‍රාත් - සැකකරුවන් ඔබට පහර දුන් බව කලින් කීවා ද? මේජර් - ඔව් මහේස්ත්‍රාත් - පහර නොදුන් බව පසුව කිවේ ඇයි? මේජර් - කම්පනය නිසා මහේස්ත්‍රාත්  - යුද සමයේ යුද බිමේ සේවය කළ කෙනකුට මේවැනි සිද්ධියකට කම්පනයකින් තොරව මුහුණ දිය නොහැකිද? මේජර් - මට අධික රුධිර පීඩනය තිබුණා මහේස්ත්‍රාත් - (පොලිසියට) මොහු බොරු සාක්කි කියනවාද  නැද්ද සොයා බලා ඔහුට එරෙහිව ගන්නා ක්‍රියාමර්ගය කුමක්දැයි මීළඟ නඩු දිනයේදී උසාවියට වාර්තාවක් ඉදිරිපත් කරන්න. වැඩි දුර විභායට ලබන 24 වැනි දිට කල් තැබිණි. ඇමැති මර්වින් සිල්වා මහතා ද අධිකරණයට පැමිණ සිටියේය.