(යොහාන් භාසුර)

ලබන සඳුදා (23) ආරම්භ වන අධ්‍යාපන පොදු සහතික පත්‍ර සාමාන්‍ය පෙළ විභාගයට බන්ධනාගාර රැඳවියන් 15 ක් ඉදිරිපත් වන බව බන්ධනාගාර දෙපාර්තමේන්තුව පවසයි.

වැලිකඩ බන්ධනාගාරයේ රැඳවියෙක්, නව මැගසින් බන්ධනාගාරයේ රඳවා සිටින එල්.ටී.ටී.ඊ විශේෂ රැදවියන් 4 ක්, වටරැක බන්ධනාගාර සුනීත පාසලේ තරුණ වරදකරුවන් 8 ක් සහ ඉන් නිදහස් වී ගිය තරුණ වරදකරුවන් 2 ක් ඇතුළු 15 ක් පෙනී සිටීමට නියමිත බවත් එම දෙපාර්තමේන්තුව කියයි.

බන්ධනාගාර දෙපාර්තමේන්තුව සහ විභාග දෙපාර්තමේන්තුව එකතුව මැගසින් බන්ධනාගාරයේ සහ වටරැක බන්ධනාගාරයේ සුනීත පාසලේ පිහිටුවා ඇති විභාග මධ්‍යස්ථානයන්හි එම රැඳවියන්ට අවශ්‍ය පහසුකම් සලසා ඇති බව බන්ධනාගාර මාධ්‍ය ප්‍රකාශක, බන්ධනාගාර කොමසාරිස් (පාලන හා පුනරුත්ථාපන) චන්දන ඒකනායක මහතා කීය.