(සුජිත් හේවාජුලිගේ)

දැනට ක්‍රියාත්මක පළාත් අතර සංචරණ සීමා ලබන 21 වැනිදා බ්‍රහස්පතින්දා දක්වා දැඩිව ක්‍රියාත්මක කිරීමට ජනාධිපති ගෝඨාභය රාජපක්ෂ මහතා උපදෙස් දුන් බව කොවිඩ් 19 පැතිරීම වැළැක්වීමේ ජාතික ක්‍රියාන්විත මධ්‍යස්ථානයේ ප්‍රධානී යුද හමුදාපති ජෙනරාල් ශවේන්ද්‍ර සිල්වා මහතා පැවැසීය.

ලබන 19 සහ 20 දිනවල යෙදී ඇති නිවාඩු දින සමග දීර්ඝ නිවාඩු සති අන්තයක් යෙදී ඇති හෙයින් සියලුම පළාත් මායිම්වලදී ගමනාගමන කටයුතු දැඩිව පරීක්ෂාවට ලක් කරන ලෙසටද ජනාධිපතිවරයා ආරක්ෂක අංශ ප්‍රධානීන්ට වැඩිදුරටත් උපදෙස්දී ඇත.

ජනාධිපතිවරයා මෙසේ උපදෙස් ලබාදී ඇත්තේ කොවිඩ් මර්දන කමිටු රැස්වීමේදීය.

මෙම රැස්වීම වීඩියෝ තාක්ෂණය ඔස්සේ ඊයේ(15) පෙරවරුවේ පැවැත්විණ.