පළාත් පාලන ආයතන ඡන්ද විමසීමේ සංශෝධන පනත් කෙටුම්පතට අනුව සීමා තීරණය කිරිමේ දී පළාත් පාලන සභිකයන් සංඛ්‍යාව 595 දෙනකුගෙන් ඉහළදැමීමට සිදුව ඇතැයි පළාත් පාලන මැතිවරණ සීමා නිර්ණ කමිටුවේ වාර්තාව පෙන්වාදෙයි.

2012 අංක 22 දරණ පළාත් පාලන ආයතන ඡන්ද විමසීම් සංශෝධන පනත මගින් පළාත් පාලන මැතිවරණය සඳහා කොට්ඨාශ ක්‍රමය හා සමානුපාතික ක්‍රමය මිශ්‍ර මැතිවරණ ක්‍රමයක් හඳුන්වාදෙන ලදී. සිමා නිර්ණ කමිටුවේ වාර්තා අනුව නව ක්‍රමය අනුව පළාත් පාලන කොට්ඨාශ 4819ක් සඳහා තේරීපත්වන මුළු සභිකයන් සංඛ්‍යාව 5081කි. කේවල කොට්ඨාශ 4573 ක් සභික සංඛ්‍යාව දෙදෙනෙකුගෙන් යුතු වූ බහු සභික කොට්ඨාශ 241ක් සහ සභික සංඛ්‍යාව තුන්දෙනෙකුගෙන් සමන්විත බහු සභික කොට්ඨාශ 9ක් ද මේ කමිටුව නිර්දේශ කැර තිබේ. පෙර පැවති ක්‍රමය අනුව තෝරාපත්කැර ගත් සභිකයන් සංඛ්‍යාව 4481ක් බැවින් එම සංඛ්‍යාව ඉදිරියේ දී 595කින් ඉහළ ගොස් ඇත.

රාජ්‍ය පරිපාලන, පළාත් පාලන සහ ප්‍රජාතන්ත්‍රීය අමාත්‍යාංශය පවසන්නේ මේ කමිටුව සඳහා මහජන නියෝජිතයන්ගෙන් යෝජනා 122ක් ලැබී තිබූ අතර ඉන් යෝජනා 56ට පළාත් පාලන ආයතනවල කොට්ඨාශ සීමා නිර්ණය කටයුතු සඳහා ජාතික කමිටුවේ අනුමැතිය ලැබුණු බවයි.

එම වාර්තාව අද අමාත්‍ය කරු ජයසූරිය මහතාට භාරදෙනු ලැබීය. එම වාර්තාව භාරගැනිමෙන් පසු අදහස් දැක්වූ අමාත්‍ය කරු ජයසූරිය මහතා කියා සිටියේ මින් ඉදිරියට කඩින් කඩ මැතිවරණ නොපවත්වවන බවයි.

මේ අතර, පළාත් පාලන ආයතන නියෝජිතයන් සඳහා නව ආචාර ධර්ම පද්ධතියක්ද හඳුන්වාදීමට පසුගියදා අමාත්‍ය මණ්ඩල අනුමැතිය හිමිවුණා.

කෙසේ වෙතත්, පළාත් පාලන ආයතනවල කොට්ඨාස සීමා නිර්ණය කිරීමේ ජාතික කමිටුවේ වාර්තාව භාරදීමෙන් පසුව අදහස් දැක්වූ විෂය භාර අමාත්‍ය කරූ ජයසූරිය කියා සිටියේ මින් ඉදිරියට කඩින් කඩ මැතිවරණ නොපවත්වන බවයි.