(රෝෂන් තුෂාර)

ශ්‍රී ලංකා මහබැංකු භාණ්ඩාගාර බැඳුම්කර මිලදී ගැනීමෙන්  රජයට පාඩුවක් කළේ යැයි කියන සැකකාර  පර්පචුවෙල් ට්‍රෙසරිස්  සමාගම සම්බන්ධයෙන්  ශ්‍රී ලංකා මහ බැංකුවෙන් වාර්තාවක් කැඳවීමට කොළඹ ප්‍රධාන මහේස්ත්‍රාත්  තනුජා  ලක්මාලී මහත්මිය අද (07)නියෝග කළාය.

අපරාධ පරීක්ෂණ දෙපාර්තමේන්තුවේ මූල්‍ය අපරාධ විමර්ශන කොට්ඨාසයේ විශේෂ විමර්ශන ඒකකය කළ ඉල්ලීමක් සලකා බැලීමෙන් පසුව මෙම නියෝගය නිකුත් කළාය .

2015 පෙබරවාරි 27දින සිදුකළ පළමු මහ බැංකු බැඳුම්කර  නිකුතුව  මගින් රජයට රුපියල් මිලියන 688කට  අධික පාඩුවක් සිදු කිරීමට එරෙහිව සිදු කරන විමර්ශනය සම්බන්ධයෙන් මෝෂමක් ගොනුකරමින් මෙම ඉල්ලීම ඉදිරිපත් කර තිබිණි.

මහා බැංකු බැඳුම්කර සිද්ධිය සම්බන්ධයෙන් හිටපු මහ බැංකු අධිපති අර්ජුන මහේන්ද්‍රන් ඇතුළු සැකකරුවන් නම දෙනෙකුට එරෙහිව මෙම විමර්ශනය සිදුකරනන අතර පර්පර්චුවල්  සමාගම එම විමර්ශනයේ තුන්වෙනි සැකකරු ලෙස නම් කර ඇත.

අපරාධ පරීක්ෂණ දෙපාර්තමේන්තුවේ නිලධාරීන් අධිකරණයට කරුණු ඉදිරිපත් කරමින් කියා සිටියේ සිද්ධිය සම්බන්ධයෙන් විමර්ශනය කිරීමට සැකකාර  සමාගම සම්බන්ධයෙන් ශ්‍රී ලංකා මහ බැංකුවෙන් විස්තර වාර්තා කැඳවීමට අවසර ලබා  දෙන ලෙසය.

ඉදිරිපත් කළ කරුණු සලකා බැලූ  ප්‍රධාන මහේස්ත්‍රාත්වරිය  අදාළ නියෝගය නිකුත් කරමින්  විමර්ශන ප්‍රගතිය කඩිනමින් අධිකරණයට ඉදිරිපත් කරන්නට නියෝග කළාය.