(ඩයනා උදයංගනී)

මෙවර නිදහස් දින සැමරුම් උළෙලේදී ජනාධිපතිවරයා ජාතිය ඇමතීම සිදුනොකරන බවත්, එදින පස්වරුවේ ජනාධිපතිවරයා ජාතිය ඇමතීමට නියමිත බවත් ආරක්‍ෂක රාජ්‍ය අමාත්‍ය ප්‍රමිත බණ්ඩාර තෙන්නකෝන් මහතා පැවසීය.

නිදහස් දින සැමරුම් උළෙල අභිමානවත්ව මෙන්ම අඩු වියදමකින් පැවැත්වීම සඳහා උළෙල පැය එක හමාරකට සීමා කරන ලෙස ජනාධිපතිවරයා උපදෙස් දී ඇති බවත් ඒ හේතුවෙන් ජනාධිපතිවරයා ජාතිය ඇමතීම වෙනම සිදුවන බවත් රාජ්‍ය අමාත්‍යවරයා සඳහන් කළේය.

ශ්‍රී ලංකාවේ 75 වන නිදහස් දින සමරු උළෙල ‘නමෝ නමෝ මාතා සියවසකට පියවරක්’ තේමාව යටතේ ජනාධිපති රනිල් වික්‍රමසිංහ සහ අග්‍රාමාත්‍ය දිනේෂ් ගුණවර්ධන මහත්වරුන්ගේ ප්‍රධානත්වයෙන් ගාලු මුවදොර පිටියේ දී ඉතා අභිමානවත් අයුරින් පැවැත්වෙන බවද රාජ්‍ය අමාත්‍යවරයා කීවේය.

ප්‍රමිත බණ්ඩාර මහතා මේ බව පැවසුවේ රජයේ ප්‍රවෘත්ති දෙපාර්තමේන්තුවේ දී අද (12) පැවති මාධ්‍ය හමුවක් අමතමිනි.

මෙවර නිදහස් දින සැමරුම ත්‍රිවිධ හමුදාව, පොලීසිය, ජාතික ශිෂ්‍ය භට බලකාය පමණක් සහභාගී වන ආචාර පෙලපාලියකින් සමන්විත අතර, එයට ත්‍රිවිධ හමුදා නිලධාරීන් හා නිලධාරිනියන් 6012කගෙන් සහ සන්නද්ධ රථ 320කින් සමන්විත බව ද රාජ්‍ය ඇමතිවරයා කීවේය.

මෙරට 100 වන නිදහස් දිනය සැමරෙන 2048 වසර දක්වා වසර 25 ක කාලයක් වෙනුවෙන් නොවෙනස් රාජ්‍ය ප්‍රතිපත්තියක් සකස් කිරීම ද මෙවර නිදහස් දින සමරු උළෙලෙන් පසු සිදුකරන බව ප්‍රමිත බණ්ඩාර මහතා පැවසීය.

නිදහස් දිනයට සමගාමීව පාසල් හා තරුණ ප්‍රජාව ඉලක්ක කරගත් තරඟාවලි, නිදහස් චතුරස්‍රයේදී 3 වැනිදා පස්වරුවේ ‘ලංකාර ලංකා’ නමින් සංස්කෘතික උළෙලක්, අඩු ආදායම්ලාභී පවුල් මිලියන 10කට සහන සැලසීම, නිවාස අහිමි පවුල්වලට නිවාස ලබාදීම ආදී කටයුතු රැසක් සිදුකිරීමට ද සැලසුම් කර ඇත.