(බිමල් ශ්‍යාමන් ජයසිංහ )

කැළණි ගඟේ සැඩ පහරට හසුව කිලෝමීටර්  නවයකට ආසන්න දුරක් මරණය පෙනි පෙනී දියඹේ ගසාගෙන යමින් සිටි 46 හැවිරිදි   දෙදරු මවකගේ දිවි බේරා ගැනීමට කඩුවෙල පොලීසියට සහ ගම්වාසීන්ට හැකිව තිබේ.

මෙලෙස රෝහල් ගත කර ඇත්තේ වැලිවේරිය කිරිකීත්ත  ප්‍රදේශයේ  දෙදරු මවකි . ඇය මේ වන විට නැගෙනහිර කොළඹ මූලික  රෝහලේ ප්‍රතිකාර ලබයි.

කැලණි ගඟෙහි නවගමුව ප්‍රදේශයේ සිට කාන්තාවක් ගඟේ ගසාගෙන යන බවට 119 පොලිස් හදිසි ඇමතුම් දුරකථන  අංකය හරහා කඩුවෙල පොලිසියට දුරකථන පණිවිඩය ක් ලැබී තිබේ.

එම අවස්ථාවේදී වසමේ සංචාරයේ කරමින් සිටි  කඩුවෙල පොලිසියේ ස්ථානාධිපති පොලිස් පරීක්ෂක කාන් වීරසිංහ මහතාට  ඒ පිළිබඳ දැනුම් දී ඇති අතර වහා ක්‍රියාත්මක වූ ස්ථානාධිපතිවරයා කඩුවෙල හන්දියේ පාලම අසලට ගොස් සෝදිසි කිරීමේදී පාලම යටින් සුළු මොහොතකට පෙරදී  එම කාන්තාව ගසාගෙන ගිය බවට  එම ස්ථානයේ සිටි පුද්ගලයෙකුගෙන් දැනගැනීමට ලැබී ඇත.

ඒ සමඟම ක්‍රියාත්මක වූ ස්ථානාධිපතිවරයා  කඹයක්ද,විදුලි පන්දම් කීපයක්ද කඩිනමින් සූදානම් කරන ලෙස සෙසු නිලධාරීන්ට උපදෙස් ලබාදෙමින් ගඟට බැසීමට හැකියාව ඇති ප්‍රදේශවාසියෙක් වන සමන් අසිත නමැත්තාද සමඟ  බෝගහ වත්ත පාලම අසලට ගොස්  ඔහු ඟඟට බැසීමට සූදානම් කරවා , සෙසු පිරිසගේද සහය පාලම මත සිට  විදුලි පන්දම් දල්වා කැලණි ගඟ ඉහළ සිට  සැඩ පහරට හසුව ගසාගෙන එන කාන්තාව අල්ලා ගැනීම ට සමත්ව තිබේ.

‍අනතුරුව  ස්ථානාධිපතිවරයා සිය නිල ජීප් රථයෙන්ම අසාධ්‍ය තත්ත්වයේ සිටි දෙදරු මව නැගෙනහිර කොළඹ මූලික රෝහල වෙත ඇතුළත් කිරීමට පියවර ගත්තේය.

ඇය දිවි නසාගැනීමේ අරමුණින් ගඟට පැන්නාදැයි පරීක්ෂණ සිදු කරන බව පොලීසිය කියයි.

කඩුවෙල පොලිසියේ ස්ථානාධිපති පොලිස් පරීක්ෂක කාන් වීරසිංහ මහතා

කාන්තාවගේ දිවි බේරූ  ෙසමන් අසිත  මහතා