(අංජුල මහික වීරරත්න)

කොළඹ උතුර සෞඛ්‍යය වෛද්‍ය නිලධාරී  කොට්ඨාසයේ ඩෙංගු මර්දනය සාර්ථක කර ගැනීමට ඉවහල්  වූ වොල්බැකියා (Wolbachia) විශේෂ ඩෙංගු මර්ධන ව්‍යාපෘතිය  කොළඹ හා ගම්පහ දිස්ත්‍රික්කයන්හි ඩෙංගු ව්‍යාප්තිය බහුල  සෞඛ්‍ය වෛද්‍ය නිලධාරී කොට්ඨාස වලද ක්‍රියාත්මක කරන  ලෙස ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානී සාගල රත්නායක මහතා බලධාරීන්ට උපදෙස් දුන්නේය.

ඒ සඳහා ත්‍රිවිධ හමුදාවේ හා පොලීසියේ සහාය ලබා ගන්නා ලෙස පැවසූ රත්නායක මහතා  රාජ්‍ය ආයතනවල ඩෙංගු මර්ධනය සඳහා විධිමත් ක්‍රියාමාර්ග ගැනීමට අදාළ රාජ්‍ය ආයතන වෙත වගකීම් පවරන ලෙසද සඳහන් කළේය.

සාගල රත්නායක මහතා මෙම උපදෙස් ලබා දුන්නේ  පාලනය පිළිබඳ   ප්‍රගති සමාලෝචන රැස්වීමේදීය.ජනාධිපති කාර්යාලයේ දී එම රැස්වීම පැවැත්විණි.

ඩෙංගු මර්දනය සම්බන්ධයෙන් සියළුම පාසල් දැනුවත් කර මව්පියන්ගේ මැදිහත්වීමෙන් පාසැල් පරිශ්‍රයන් පිරිසිදු කර ඡායාරූප සමඟ වාර්තා කරන ලෙස අදාල අධ්‍යාපන බලධාරීන්ට උපදෙස් ලබා දෙන ලෙස දැනුම් දුන් සාගල රත්නායක මහතා 2024 ජනවාරි මස මුල් සතියේදී මෙම වැඩසටහන් පිළිබඳ ප්‍රගතිය නැවත සමාලෝචනය කිරීමට ද යෝජනා කළේය. 

සෞඛ්‍ය රාජ්‍ය අමාත්‍ය සීතා අරඹේපොල මහත්මිද මීට සහභාගී වූවාය.