(තරංග ගුණරත්න)

දිවයිනට බලපා ඇති ආපදා තත්ත්වය පිළිබඳව ශ්‍රී ලංකා ගුවන් හමුදාව ගුවන් නිරීක්ෂණයකින් පසු ගුවන් යානා සහ බට පිරිස් ස්ථානගත කිරීමට පියවර ගෙන ඇතැයි ගුවන් හමුදාව පවසයි.

දිවයිනට බලපා ඇති අයහපත් කාලගුණික තත්ත්වය හමුවේ හදිසි ආපදා තත්ත්වය සඳහා සහන සැලසීම හා ජනතාව මුදවා ගැනීමේ කටයුතු සඳහා ඒ සඳහා ගුවන් යානා සහ අදාළ බට පිරිස් ස්ථානගත කර සූදානමින් තැබීමට ගුවන් හමුදාව පියවර ගෙන තිබේ.

ඒ අනුව ගුවන් හමුදාවට අයත් Y12 වර්ගයේ ගුවන් යානයක් යොදා ගනිමින් දකුණු පළාතට බලපා ඇති ආපදා තත්ත්වය පිළිබඳව ගුවනින් නිරීක්ෂණය කිරීමේ කටයුතු (3) දින සිදු කරන ලදී.

තවද අයහපත් කාලගුණික තත්ත්වය හමුවේ වැඩිම අවදානමක් ඇති ගාල්ල දිස්ත්‍රික්කයේ නෙළුව ප්‍රදේශයේ හදිසි තත්ත්වයක් ඇති වුවහොත් ජනතාව මුදවා ගැනීම සඳහා ශ්‍රී ලංකා ගුවන් හමුදාවට අයත් බෙල් 412 වර්ගයේ හෙළිකොප්ටර් යානාවක් සහ ජනතාව මුදවා ගැනීමේ සුවිශේෂී පුහුණුවක් ඇති ගුවන් හමුදා රෙජිමේන්තුවේ විශේෂ බලකා බට පිරිස් නෙළුව මහජන ක්‍රීඩාංගනයේ ස්ථානගත කර තැබීමට පියවර ගෙන තිබේ.

මෙම කටයුතු ගුවන් හමුදාපති එයාර් මාර්ෂල් උදේනි රාජපක්ෂ මහතාගේ උපදෙස් මත සිදු කරන බව ශ්‍රී ලංකා ගුවන් හමුදාව පැවසීය.