(නිමන්ති රණසිංහ)

කොරියාවේ තේගු ප්‍රාන්තයේදී මීට වසර 19කට ඉහතදී දහඅට හැවිරිදි දැරියක සමූහ දූෂණයකට ලක් කර ඝාතනය කර මෙරටට පැමිණ සිටින ශ්‍රී ලාංකිකයන් තිදෙනකු අත්අඩංගුවට ගැනීමට අපරාධ පරීක්‍ෂණ දෙපාර්තමේන්තුවේ ජාත්‍යන්තර පොලිස් ඒකකය පරීක්‍ෂණයක් ආරම්භ කර ඇතැයි එම ඒකකය කොටුව මහේස්ත්‍රාත් ලංකා ජයරත්න මෙනෙවියට ඊයේ (01) දැනුම් දුන්නේය.

ශ්‍රී ලාංකිකයකු මෙරට දේශසීමාවෙන් පිටත සිදුකරන ලද අපරාධයක් සම්බන්ධයෙන් කටයුතු කිරීම සඳහා අධිකරණ සංවිධාන පනතේ ප්‍රතිපාදන අනුව මෙරට අධිකරණයට බලය ඇති බවට නීතිපතිවරයාගෙන් ලද උපදෙස් ප්‍රකාරව මෙම පරීක්‍ෂණය සිදුකෙරෙන බව අපරාධ පරීක්‍ෂණ දෙපාර්තමේන්තුවේ ජාත්‍යන්තර පොලිස් ඒකකයේ පොලිස් අධිකාරී වෙදසිංහ මහතා ඇතුළු නිලධාරීහු පිරිසක් ඊයේ (02) අධිකරණය වෙත එලෙසින් කරුණු වාර්තා කළහ.

මෙම සිද්ධියට අදාළ පරීක්‍ෂණයක් ආරම්භ කරන ලෙස ඉල්ලීම සඳහා කොරියානු රාජ්‍ය තාන්ත්‍රික දූත පිරිසක් ඉකුත් මැයි මස 30 වැනිදා මෙරටට පැමිණ නීතිපතිවරයාත් අධිකරණ අමාත්‍යාංශයේ ඉහළ නිලධාරීන් මෙන්ම අපරාධ පරීක්‍ෂණ දෙපාර්තමේන්තුවත් සමඟ විශේෂ හමුවක් පවත්වා ඇතැයි ද අපරාධ පරීක්‍ෂණ දෙපාර්තමේන්තු ජාත්‍යන්තර පොලිස් ඒකකය අධිකරණයට දැනුම් දුන්නේය.

මෙම සිද්ධියට අදාළ විමර්ශනයක් ආරම්භ කරන ලෙස කොරියානු රජය පසුගිය අගෝස්තු 28 වැනිදා මෙරට බලධාරීන්ගෙන් රාජ්‍ය තාන්ත්‍රික මට්ටමින් ඉල්ලීමක් කළ බව ද එම ඒකකය වැඩිදුරටත් දැනුම් දුන්නේය.

කොරියාවේ තේගු ප්‍රාන්තයේ ‘භූමා’ අධිවේගී මාර්ගයේදී 1998 වර්ෂයේ දිනෙක එවකට වයස අවුරුදු 18ක දැරියක් රිය අනතුරකින් මිය යාමේ සිද්ධියක් වාර්තා වී ඇති බවත්, ඒ සිද්ධිය සම්බන්ධයෙන් කොරියන් රහස් පොලිසිය විමර්ශනයක් ආරම්භ කර එරට අධිකරණයට කරුණු වාර්තා කර තිබූ බවත් රහස් පොලිසිය අධිකරණයට වාර්තා කර ඇත.

මෙම අනතුරෙන් මියගිය දැරියගේ යට ඇඳුමෙන් සොයා ගනු ලැබූ ශුක්‍රාණු පැල්ලම් කිහිපයක් සම්බන්ධයෙන් විමර්ශන කණ්ඩායම්වල අවධානය යොමුවීමෙන් අනතුරුව ඒ පිළිබඳව ඩී.එන්.ඒ. වාර්තා කැඳවීම සිදුකර ඇති බවත්, එහිදී දැරිය සමූහ දූෂණයකට ලක්වීමෙන් පසු මරණය සිදුවී ඇති බවට එරට පරීක්‍ෂණ කණ්ඩායම විසින් සොයාගෙන ඇති බවත් කියා සිටි රහස් පොලිසිය ඒ වනවිට එම ඩී.එන්.ඒ. සැසදීමට සැකකරුවන් කිසිවකුත් අනාවරණය නොවූ නිසා එම ඩී.එන්.ඒ ගබඩා කර තබා ඇති බව ද සඳහන් කළේය.

පසුව 2010 වර්ෂයේදී කොරියාවේදී තවත් බාලවයස්කාර දැරියකට මුදලට ලිංගික සබඳතාවකට ආරාධනා කිරීමේ සිද්ධියකට ශ්‍රී ලාංකිකයකු වරදකරු වී ඇති බවත් එම චූදිතයා ශ්‍රී ලාංකිකයකු වන අතර 1998 වර්ෂයේ සිදුවූ ස්ත්‍රී දූෂණයට අදාළ ඩී.එන්.ඒ. සමඟ මෙම වරදකරුගේ ඩී.එන්.ඒ. සැසදෙන බවත් එරට පොලිසිය විසින් අනාවරණය කරගෙන ඇති බව ද අපරාධ පරීක්‍ෂණ දෙපාර්තමේන්තුව වැඩිදුරටත් අධිකරණයට දන්වා සිටියේය.

ශ්‍රී ලංකාවේදී පුද්ගලයකු වරදකරුවකු වූ අවස්ථාවක ඔහුගේ ඇඟිලි සලකුණු ලබාගැනීමේ ක්‍රමවේදය භාවිත කරනු ලබන අතර කොරියාවේ ඩී.එන්.ඒ. ලබාගැනීමේ ක්‍රමවේදය භාවිත කරනු ලබන බව ද ඒ අනුව මෙම අපරාධ දෙකම සිදුකර ඇත්තේ එක් පුද්ගලයකු විසින් බවට කරුණු අනාවරණය වී ඇති බව රහස් පොලිසිය කියා සිටියේය.

ඒ අනුව කොරියාවේ තේගු ප්‍රාන්ත පොලිසිය විසින් මෙම සැකකරු 1998 සිද්ධියට අදාළව එරට අධිකරණය වෙත ඉදිරිපත් කරනු ලැබුව ද එරට නීතිය අනුව වසර දහයක් ඉක්ම ගිය ස්ත්‍රී දූෂණ අපරාධයක් සම්බන්ධයෙන් කටයුතු කිරීම සිදුනොකරනු ලබන බැවින් මෙම සැකකරු එම අධිකරණය විසින් නිදහස් කර ඇතැයි ද අපරාධ පරීක්‍ෂණ දෙපාර්තමේන්තුව වැඩිදුරටත් අධිකරණයට දැනුම් දුන්නේය.

ඒ අනුව නීතිපතිවරයාගේ මෙන්ම ජාත්‍යන්තර පොලිසියේ සහ කොරියානු රටේ බලධාරීන්ගේ මැදිහත් වීම මත තම දෙපාර්තමේන්තුවේ නිලධාරීන් පිරිසක් කොරියාවට ගොස් අපරාධ ස්ථානය මෙන්ම සිද්ධියට අදාළ පරීක්‍ෂණ පැවැත්වූ බව ද එහිදී මෙම සිද්ධියට කොරියාවේ රැකියාවල යෙදී සිටි ශ්‍රීලාංකිකයන් තිදෙනකු සම්බන්ධ බව අනාවරණය වී ඇති බව ද අපරාධ පරීක්ෂණ දෙපාර්තමේන්තුව අධිකරණයට දන්වා සිටියේය.

මෙම සිද්ධියට අදාළ සැකකරුවන් තිදෙනා මේ වනවිට කොරියන් රටේ සේවය නිමවා මෙරටට පැමිණ ඇති බවත්, එම සැකකරුවන් සම්බන්ධයෙන් අධිකරණය වෙත කරුණු වාර්තා කරනු ලබන බවත් මෙහිදී අපරාධ පරීක්‍ෂණ දෙපාර්තමේන්තුව වැඩිදුරටත් අධිකරණයට දැනුම් දුන්නේය.

ඉදිරිපත් වූ කරුණු සැලකිල්ලට ගත් අධිකරණය සැකකරුවන් සම්බන්ධයෙන් වහාම විමර්ශනයක් පවත්වා ඔවුන් අධිකරණයට ඉදිරිපත් කරන ලෙස අපරාධ පරීක්‍ෂණ දෙපාර්තමේන්තුවේ ජාත්‍යන්තර පොලිස් ඒකකයට නියෝග කළේය.