(සුමිත් ප්‍රේමතිලක)

කොරෝනා වයිරසයට ආසාදනය වූ බවට හඳුනාගත් අයකුගේ මළසිරුරක් දින 18 ක් තිස්සේ පානදුර මූලික රෝහලේ මෘත ශරීරාගාරයේ තැන්පත් කර ඇතැයි රෝහල් ආරංචි මාර්ග පවසයි.

පානදුර ප්‍රදේශයේ දී පසුගිය මාර්තු 29 දා රිය අනතුරකින් මියගිය මොරටුව කොරලවැල්ල ප්‍රදේශයේ පදිංචි 71 හැවිරිදි පුද්ගලයකුගේ මළ සිරුරක් මෙසේ මෘත ශරීරාගාරයේ තැන්පත් කර ඇතැයි පැවසේ.

පානදුර ප්‍රදේශයේ දී ඔක්තෝම්බර් 9 දා රිය අනතුරකට ලක්ව  මාස 5 කට අධික කාලයක් රෝහල්ගතව ප්‍රතිකාර ලබමින් සිටියදී මෙම පුද්ගලයා පසුගිය මාර්තු 29 දා ගෝනදූව රජයේ රෝහලේ දී මියගොස් තිබේ .

පසුව ඔහුගේ මෘත දේහය පානදුර මූලික රෝහලට රැගෙන ගොස් එහිදී සිදුකළ පීසීආර් පරීක්ෂණයේදී කොවීඩ් 19 වෛරසය වැළඳී ඇති බවට තහවුරු වී ඇතැයි පැවසේ.

මේ සම්බන්ධයෙන් පානදුර මූලික රෝහලේ අධ්‍යක්ෂ ඉන්ද්‍රානි ගොඩකන්ද මහත්මිය මෙසේ පැවසුවාය. ඒ සම්බන්ධයෙන් මට තවම වාර්තා වී නැහැ. කොහොම වුණත් මම මේ ගැන ඉක්මනින් හොයා බලන්නවා.