(සුජිත් හේවාජුලිගේ )

කොරෝනා වයිරසය පැතිරීම නතර කළ හැක්කේ මුළු දිවයිනම දින දා හතරක් අඛණ්ඩවම වසා දැමූව හොත් පමණකැයි වයිරසවේදය පිළිබඳ ප්‍රකට විද්‍යාඥයකුවන මහාචාර්ය තිස්ස විතාරණ මහතා පවසයි.

එසේ කටයුතු නොකර මේ තත්වය කිසිසේත්ම පාලනය කළ නොහැකි යැයි පැවැසූ විතාරණ මහතා කොරෝනා පාලනයට රට දින දෙක තුනක් පමණක් වැසීම ප්‍රතිඵලදායක නැතැයිද සඳහන් කරයි.

රට දින දාහතරක් වැසිය යුතු බවට වෛද්‍ය විශේෂඥයන් කරන ප්‍රකාශ සත්‍යයක් යැයිද ඔහු කියයි.

රටේ දැනට පවතින්නේ ඉතාම දරුණු තත්වයක් බවත් රට ඛේදවාචකයක් දක්වා ගමන් කරමින් සිටින බවත් තිස්ස විතාරණ මහතා පවසයි.

මේ තත්වය මෙතනින් පාලනය කරගත නොහැකි වුවහොත් දහස් ගණනින් මැරී වැටෙන තත්ත්වයක් ඇති විය හැකි බවද මහාචාර්යවරයා කීවේය.

රට දින දාහතරක් වසා ඇති අවස්ථාවේදී ජනතාව සෞඛ්‍ය නීති පිළිබඳව දැනුවත් කිරිම සදහා සෞඛ්‍ය අධ්‍යාපනික වැඩසටහනක් රට පුරා පුළුල් ආකාරයෙන් ක්‍රියාත්මක කළ යුතු බවද විද්‍යුත් හා මුද්‍රිත මාර්ගයෙන් මෙන්ම පත්‍රිකා මාර්ගයෙන්ද ඒ කටයුත්ත කළ හැකි බවද ඔහු පැවසීය.

සතියකදී ඒ දැනුවත් කිරීම කළ හැකි බවද විතාරණ මහතා ප්‍රකාශ කළේය.