(අජිත්ලාල් ශාන්තඋදය සහ ජයන්ත නානායක්කාර)

සියලුම මාපියන් වෙනුවෙන් රජයෙනුත් ගුරු විදුහල්පතිවරුන්ගෙන් ඉල්ලිමක් කරනවා, කරුණාකරලා මධ්‍යස්ථ තැනකට එන්න. දරුවන්ගේ අනාගතය නම් ඒ ගැන හිතලා අපි හැම දෙනාම මධ්‍යස්ථභාවයකට ආ යුතුයි. අනුකාරක සභාවේ තීරණය වු 33%වත් ගන්න ගුරු විදුහල්පති සංගම් එකඟයි. රජයත් නිහතාමනී විය යුතුයි. ගුරු විදුහල්පති සංගම් සති දෙකක කාලයක් තිස්සේ මුදල් ඇමතිවරයා හම්බවෙන්න උත්සාහ ගන්නවා. අදවන තුරු මුදල් ඇමතිතුමාගෙන් කොළ එළියක් ලැබිලා නැතැයි රමාඤ්ඤ මහා නිකායේ දක්‍ෂිණ ලංකාවේ ප්‍රධාන සංඝනායක ආචාර්ය ඕමල්පේ සොභිත හිමියෝ පවසති.

ශ්‍රේණිධාරී විදුහල්පති සංගම් එකමුතුවේ නියෝජිත පිරිසක් උන්වහන්සේ හමුවීමෙන් පසු පැවති මාධ්‍ය හමුවකදී අදහස් දැක්වූ සෝභිත හිමියෝ මෙසේ ද පැවසූහ.

අද ගුරු වෘත්තියේ 80%ක් ඉන්නේ කාන්තාවන්. බරපතල අර්බූදයක්. පිරිමි මේ වෘත්තියට ආකර්ශනය වෙන්නේ නැහැ. ගුරු වෘත්තිය කියන්නේ දෙවන තුන්වන පංතියේ රැකියාවක්ය කියන එක තමයි පිළිගැනිමට ලක්වෙලා තියෙන්නේ. ඒ නිසායි පිරිමි ගුරු වෘත්තියට එන්නේ නැතිව වෙනත් විශේෂඥ වෘත්තීන් සොයා යන්නේ.

ගුරු වෘත්තිකයන්ගේ ගැටලු සම්බන්‍ධයෙන් සොයා බලන්නට ඇමති අනුකාරක සභාවක් පසුගියදා පත්කරනු ලැබුවා. විමල් වීරවංශ ඇමතිතුමා ප්‍රමුඛ එම අනුකාරක සභාවෙන් තීරණය කෙරුණේ වැටුප් විෂමතාවෙන් ඉල්ලන ප්‍රමාණය නෙවෙයි තුනෙන් එකක තරම් ප්‍රමාණයක් විසඳන්න පුලුවන් කියලා. ඒ සම්බන්‍ධයෙන් ගුරු සංගම් නියෝජිතයන් සමග නිසි අදහස් හුවමාරුවක් වෙලා නෑ. නමුත් ඒ යෝජනාව කැබිනට් මණ්ඩලය විසින් ප්‍රතික්‍ෂේප කරනවා. කැබිනට් මණ්ඩලය කියන්නේ ඔවුන් පත්කරපු අනුකාරක සභාවේ නිර්දේශය වූ තුනෙන් එක එගෙවන්න බෑ, ඒ තුනෙන් එකෙන් හතරෙන් එකක් ගෙවන්නම් කියලා. මේක අතිශයින් ම අසාධාරණයක් නෙවෙයි, මේක උපහාසාත්මක ක්‍රියාවක්.

කැබිනට් මණ්ඩලයට අනුකාරක සභාවේ තීරණය පිළිගන්න බැරිනම් ඇයි අනුකාරක සභාවක් පත්කළේ. අනුකාරක සභාවක් කියන්නේ විනිශ්චය සභාවක් වගේ එකක්. ඒකේ තීරණය පිළිගන්නේ නැතුව වෙනස් කරනවා නම් ඒ අනුකාරක සභාව උපහාසයටත් අපහාසයටත් යොමුවෙන්නේ නැද්ද?

අනුකාරක සභාවේ තීරණය වු 33%වත් ගෙවන්න රජය එකඟවිය යුතුයි. ගුරු, විදුහල්පතිවරුන්ගේ ඉල්ලිම ඉන් පූර්ණ නොවුනත් ඒ මට්ටමින් හෝ ගෙවා මේ ගැටලුවට විසඳුම් දෙන්න රජය නම්‍යශිලී වී ගුරුවිදුහල්පතිවරුන්ගේ සහාය ලබා ගත යුතුයි. අනුකාරක සභාවේ යෝජනාව තවදුරටත් හෑල්ලු කරන්න කැබිනට් මණ්ඩලය කටයුතු නොකළ යුතුයි. මේ ආකාරයෙන් ගුරුවරුන්ගේ ඉල්ලීම හෑල්ලුවට ලක්කරන්න එපා.