(සුජිත් හේවාජුලිගේ සහ ආරියරත්න රණබාහු)

ක්‍රිකට් ක්‍රීඩාවේ ජය පරාජය දෙකේම වගකීම තමා බාර ගන්නා බව ක්‍රීඩා ඇමැති ජනාධිපති නීතිඥ ෆයිසර් මුස්තාපා මහතා පාර්ලිමේන්තුවේදී අද (21) පැවැසීය.

‘‘මැච් පරදිනකොට ඇමැතිට ඕන තරම් ගහන්න.අහිංසක ක්‍රීඩකයන්ට ගහන්න එපා‘‘ යැයිද ඇමැතිවරයා කීවේය.

ක්‍රීඩා ඇමැතිවරයා මේ බව පැවැසුවේ ක්‍රීකට් ක්‍රීඩාවේ පසුබෑම සම්බන්ධයෙන් මාතර දිස්ත්‍රික් මන්ත්‍රී කාංචන විජේසේකර මහතා ඉදිරිපත් කළ සභාව කල් තබන අවස්ථාවේ යෝජනා පිළිබඳ විවාදයේ පිළිතුරු කතාව කරමිනි.

ෆයිසර් මුස්තාපා මහතා මෙසේද කීය.

     ‘‘ඕනෑම ක්‍රීඩාවක ජය පරාජය සම සිතින් බාර ගැනීම මනුස්සකමයි.අපේ ක්‍රීඩකයන් ඇෆ්ගන්ස්ථානයට, බංගලාදේශයට පැරදුනා කියලා ශ්‍රී ලංකාවේ ක්‍රිකට් වැටුණේ නැහැ. තරඟ දෙකකින් අපේ ක්‍රිකට් මනින්න එපා.අද අපේ ක්‍රිකට් ක්‍රීඩකයන්ට අන්තර්ජාලයෙන් දිගට හරහට ගහනවා.මෙහෙම කරන කොට ක්‍රීඩකයන්ගේ මානසික මට්ටම බිංදුවට වැටෙනවා.ක්‍රිකට් හා දේශපාලය කියන්නේ දෙකක්.

අද මැතිසබයට ගෙන ආ මේ යෝජනාව අපේ ක්‍රිකට් ක්‍රිඩකයන්ට කරපු ලොකුම අපරාධයයි.

‘‘ අපේ ක්‍රිකට්වල ප්‍රගතියක් නැහැ කියන එක මම පිළිගන්නේ නැහැ.චන්දික හතුරුසිංහ අවට පස්සේ  ප්‍රගතිය සියයට 57 ට ගියා. ක්‍රීඩාවේ හොරු අල්ලන වගකීම මා බාර ගත්තා.