(නිමන්ති රණසිංහ)

ශ්‍රී ලංකා රජයට අයත් ඇමරිකානු ඩොලර් මිලියන 6.5ක (රුපියල් කෝටි 211) මුදලක් සාවද්‍ය පරිහරණය කළැයි හිටපු මහ බැංකු අධිපති අජිත් නිවාඩ් කබ්රාල් මහතාට එරෙහිව කොටුව මහේස්ත්‍රාත් අධිකරණය හමුවේ ඉදිරිපත් කර තිබූ පුද්ගලික පැමිණීල්ලක් අද (25) ඉල්ලා අස්කර ගත්තේය.

ඒ අනුව, එම නඩුවෙන් හිටපු මහ බැංකු අධිපතිවරයා නිදහස් කිරීමට කොළඹ කොටුව මහේස්ත්‍රාත් තිළිණ ගමගේ මහතා නියෝග කළේය.

නාලන්දාරාම, නුගේගොඩ ලිපිනැති පූජ්‍ය තීනියාවල පාලිත හිමියන් විසින් අධිකරණයට ඉදිරිපත් කර තිබූ මෙම පුද්ගලික පැමිණීල්ල, තාක්ෂණීක දෝෂයක් හේතුවෙන් ඉල්ලා අස්කර ගනු ලබන බවට උන්වහන්සේ වෙනුවෙන් අධිකරණයේ පෙනී සිටි ජනාධිපති නිතීඥ මෛත්‍රී ගුණරත්න මහතා කළ ඉල්ලීමක් සැලකිල්ලට ගත් මහේස්ත්‍රාත්වරයා මෙම නියෝගය නිකුත් කළේය.

මෙම පැමිණීල්ල නැවත නඩු පැවරීමේ එකගතාව මත එසේ ඉල්ලා අස්කරගනු ලබන බව ද මෙහිදී ජනාධිපති නිතීඥවරයා අධිකරණයට දැනුම් දුන්නේය.