(රන්ජන් කස්තුරි සහ සුජිත් හේවාජුලිගේ)

බැඳුම්කර මගඩිය හෙළිදරව් වීම නිසා කෝපයට පත් එක්සත් ජාතික පක්ෂ පසුපෙළ මන්ත‍්‍රීවරුන් ජනාධිපතිවරයාට නගන විවිධ අවලාදවලට එරෙහිව ජනාධිපතිවරයා සමඟ එකට සිට ගැනීමට ඒකාබද්ධ විපක්‍ෂය තීරණය කර ඇතැයි පාර්ලිමේන්තු මන්ත‍්‍රී බන්දුල ගුණවර්ධන මහතා පැවැසීය.

මහදවල් සිදුවූ බැඳුම්කර කොල්ලය රටට හෙළි වී අවසන් බව කී මන්ත‍්‍රීවරයා බැඳුම්කර මගඩිය යට ගැසීමට නොහැකි වූ තැන ප‍්‍රකෝපයට පත් එජාප මන්ත‍්‍රීවරුන් ජනාධිපතිවරයාට මඩ ගැසීමට, අවලාද නැගීමට පටන්ගෙන ඇති බව කීවේය.

එක එක්කෙනාගේ තර්ජන ගර්ජනවලට යට නොවී බැඳුම්කර හොරුන්ට දඬුවම් දෙන්නැයි ජනාධිපතිවරයාගෙන් ඉල්ලා සිටින බව කී මන්ත‍්‍රීවරයා මේ අවස්ථාවේදී ඒකාබද්ධ විපක්‍ෂය ජනාධිපතිවරයාට සහාය දෙන බව සඳහන් කළේය.

බන්දුල ගුණවර්ධන මහතා මේ බව පැවැසුවේ පාර්ලිමේන්තු සංකීර්ණයේ පෙරේදා පැවැති මාධ්‍ය හමුවකට සහභාගි වෙමිනි. බැඳුම්කර සිද්ධිය එජාපය හත්පොලේ ගාගෙන අවසන් බව ද මන්ත‍්‍රීවරයා කීවේය.

විධායක ජනාධිපතිවරයකුට එරෙහිව ප‍්‍රකාශ කරන ඇමැතිවරුන් එම ධුරවලින් ඉවත් කළ නොහැකි බව කී බන්දුල ගුණවර්ධන මහතා ජනාධිපතිවරයාට කසේරුකාවක් තිබේ නම් සුජීව සේනසිංහ ඇමැතිවරයා ඉවත් කළ හැකි බව පැවැසීය.