(අජන්ත රත්නායක)

එළැඹෙන අයවැය විශාල බලාපොරොත්තුවක් නෑ. එවැනි බලාපොරොත්තු තබාගත හැකි තත්ත්වයක් මේ වන විට රටේ ආර්ථිකය තුළ නැහැ යැයි රාජ්‍ය අමාත්‍ය දයාසිරි ජයසේකර මහතා කියයි.

අමාත්‍යවරයා මේ බව පැවසුවේ ශ්‍රී ලංකා නිදහස් පක්ෂ කුරුණෑගල ආසන බල මණ්ඩල රැස්වීමක් අවසානයේ දී මාධ්‍යවේදීන් කළ විමසීමකට පිළිතුරු දෙමිනි. ඉදිරි අයවැයෙන් ජනතාවට විශාල සහන ලැබේවි යැයි තමන් නොසිතන බවද ඇමැතිවරයා මෙහිදී පැවසීය.

අයවැයවලින් සහන දෙනවා කීම මුලාවක් බවත්, අයවැයකින් සහනදීම කිසිම කෙනකු බලාපොරොත්තු නොවිය යුතු බවද හෙතෙම පැවසීය.

අයවැය යනු ඒ ඒ වසරේ ඇති තත්ත්වයන්ට මුහුණදීමට හැකි වැඩ පිළිවෙළක් සකස්කිරීම වන නමුත් අවාසනාවකට මෙන් ලංකාවේ ජනතාව අයවැයෙන් වැටුප් වැඩිවීම් සහ සහන ලැබෙතැයි සිතීමට පුරුදු වී සිටින බවද පැවසීය.

අයවැය යනු නත්තල් දවසට එන නත්තල් සීයාගෙ බඩු මල්ල වැනි යැයි ජනතාව සිතාගෙන සිටින බවත් එය සම්පූර්ණයෙන්ම වැරදි බවද හේ පැවසීය. අද වන විට රටට මෙවැනි විනාශයක් සිදු වී ඇත්තේ එම වැරදි වැටහීම නිසා බවද කීය. එබැවින් අයවැය යනු ඉදිරි වසරේ රටේ අනාගතය සහ ආර්ථික වැඩපිළිවෙළ පෙන්වන කැඩපතක් බවත් එහිදී යම් සහන දීමට මෙන්ම බදු වැඩි කිරීමටත් හැකි බවද පැවසීය. අයවැයෙන් පසුව අනේ අපට මුකුත් ලැබුණේ නැහැයි යන මානසිකත්වයේ සිටීම හොඳ නැති බවද කීය.