(නිමල කොඩිතුවක්කු)

ශ්‍රී ලංගම බස්රථ වලට අවශ්‍ය ටයර්, බැටරි ඇතුළු අමතර කොටස් හිඟවීම හේතුවෙන් පොදු මගී ප්‍රවාහන සේවය ඇණහිටීමේ අවදානමකට ලක්ව ඇතැයි සමස්ත ලංකා ප්‍රවාහන සේවක සංගමයේ ලේකම් සේපාල ලියනගේ මහතා සඳහන් කරයි.

බස්රථ ධාවනය කිරීමට අත්‍යාවශ්‍ය ටයර්, බැටරි සහ අමතර කොටස් නොමැති වීමෙන් බස්රථ 1000 කට ආසන්න ප්‍රමාණයක් මේ මොහොතේ ධාවනයෙන් ඉවත්වී ඇති බවත් ඔහු සඳහන් කරයි.

ටයර්, බැටරි ඇතුළු අමතර කොටස් වෙළෙඳ පොලේ අධික ලෙස මිල ඉහළ යාම හේතුවෙන් ශ්‍රී ලංගමයට එම අධික මිල දරා ගැනීමට නොහැකි වී ඇති බවත් මේ සම්බන්ධයෙන් ජනාධිපතිවරයා, ප්‍රවාහන අමාත්‍යවරයා  ඇතුළු බලධාරීන් දැනුවත් කිරීමට පියවර ගත් බවත් සේපාල ලියනගේ මහතා පැවසීය.

ඉන්ධන අර්බුදය උග්‍ර අතට පත්වී ඇති තත්ත්වයක් තුළ පොදු ජනතාවගේ සියලුම අවශ්‍යතා සඳහා ගමන්බිමන් යාමට ශ්‍රී ලංගමයේ බස්රථ භාවිතා කරන බැවින් අමතර කොටස් නොමැතිවීමෙන් මගී ප්‍රවාහන සේවා සම්පූර්ණයෙන්ම ඇන හිටින තත්ත්වයක් උද්ගත විය හැකි බවද ඔහු සඳහන් කළේය.