( ෂේන් සෙනෙවිරත්න)

රටේ පවතින අපරාධ රැල්ල මර්දනය කිරීම සඳහා පොලිසියේ මෙන්ම ත්‍රිවිධ හමුදාවගේද ජනතාවගේ ද සහායගනිමින් ඉදිරියේදී විධිමත්ව කටයුතු කරන බව නව පොලිස්පති ප්‍රියන්ත වීරසූරිය මහතා පවසයි.

පාතාල ක්‍රියාකාරකම් සහ ඒ හා බැඳි පවතින මත්ද්‍රව්‍ය ජාවාරම අද ඊයේ ඇතිවූවක් නොවන බවත් ඒ සඳහා දේශපාලන ආශිර්වාදය මෙන්ම පොලිසියේ ඇතැම් නිලධාරීන්ගේ ආශිර්වාදයද ලබා ගනිමින් ත්‍රිවිධ හමුදාවේ ඇතැම් අයගේද සහය ලබා ගනිමින්  කරගෙන පැමිණ ඇති බවද පොස්පතිවරයා පවසයි.

මෙරට 37 වැනි පොලිස්පතිවරයා වශයෙන් අභිනව පොලිස්පති ප්‍රියන්ත වීරසූරිය මහතා වැඩබාර ගැනීමෙන් අනතුරුව මහනුවරට පැමිණ දළදා සමිඳුන් වැඳ පුදා ගැනීමෙන් අනතුරුව මල්වතු අස්ගිරි මහනාහිමිපාණන් වහන්සේලා බැහැ දැක ආශිර්වාද ලබා ගැනීමෙන් පසු මාධ්‍ය හමුවේ අදහස් දක්වමින් පොලිස්පතිවරයා වැඩිදුරටත් මෙසේ පැවසීය.

මෙරට පාතාල අපරාධකරුවන් සහ මත්ද්‍රව්‍ය ජාවාරම්කරුවන් සමාජයේ විවිධ තනවල පුද්ගලයන් ඔවුන්ගේ කටයුතු සඳහා භාවිතා කරමින් සිටින බව පැවසූ පොලිස්පති වරයා නිවට නියාලු පිරිසක් විදේශගත වී එම කටයුතුවල නියැලී සිටින බවත් ඔවුන්ට එරෙහිව ජාත්‍යන්තර පොලිසියත් සමග සම්බන්ධ වී ඉදිරියේදී ඔවුන් අත්අඩංගුවට ගැනීම සඳහා විධිමත් වැඩපිළිවෙලක් යොදන බවද පොලිස්පතිවරයා පැවසීය.

පොලිස්පතිවරයා විසින් ජනතාවට හඳුන්වා දුන් නව වට්ස් අප් අංකය හරහා එක් දිනකට ලැබුණු පැමිණිලි 2000 න් පෙනී යන්නේ ජනතාවට පොලිසියෙන් විසඳාගත නොහැකි ප්‍රශ්න විශාල ප්‍රමාණයක් තිබෙන බවත් ඒවා විධිමත්ව ඉදිරියේදී විසඳීමට පියවර ගන්නා බවද  පැවසු පොලිස්පතිවරයා ඉදිරියේදී ජනතාවගෙන් එවැනි පැමිණිලි නොයන තැනට කටයුතු කරන බවද පැවසීය.

වත්මන් දේශපාලනයෙන් කිසිදු ආකාරයක බලපෑමක් නොමැති බවත් බලපෑමක් තිබෙනවා නම් තිබෙන්නේ හරි දේ කරන්න යැයි කියා බව කිසිදු අපරාධයක් හැංඟීමට හෝ නොසලකා හැරීමට විමර්ෂනය නොකර සිටීමට කිසිසේත්ම පොලිස්පතිවරයා වශයෙන් තම පහළ නිලධාරීන්ට උපදෙස් නොලැබෙන බවද පැවසීය.

එවැනි ආකාරයේ සිදුවීම් අතීතයේදී සිදුවූ බවත් ඒ හේතුවෙන් අපරාධකරුවන් නිදැල්ලේ සිටි බවද මේ දේශපාලන පරිසරයත් සමග ශ්‍රී ලංකා පොලිසියට කටයුතු කළ නොහැකි නම් එය විශාල දුර්වලතාවයක් වනු ඇති බවද කීය.

පොලිස් නිලධාරීන්ට ලැබිය යුතු උසස් වීම් 2020 සිට නැවතී තිබුණු බවත් ඒ සම්බන්ධයෙන් වූ උසස් කිරීමේ පටිපාටිය මේ වන විට සම්මත කරගෙන තිබෙන බවත් ඒ සම්බන්ධයෙන් වූ මූලික එකඟතා ජාතික පොලිස් කොමිසමෙන් ලබාගෙන තිබෙන බැවින් ඉදිරි මාසය තුළ ඒ සඳහා සාධනීය පිළිතුරක් ලබාදිය හැකි වනු ඇති බවද පැවසීය.

මේ වන විට පොලිස් දෙපාර්තමේන්තුව තුළ නිලධාරීහිගය 30,000 ක් පමණ ඇති බවත් රජය ප්‍රතිපත්තියක් හේතුවෙන් පසුගිය වසර තුන තුළ පොලිසියට බඳවා ගැනීම් සිදු නොකළ බවත් මේ වනවිට ඉදිරි වසරේදී නිලධාරීන් 5000 ක් සහ ඊළඟ වසරේදී තවත් 10,000 ක් බඳවා ගැනීම සඳහා අවශ්‍ය මූලික ක්‍රියාමාර්ග ගනිමින් සිටින බවද පොලිස්පතිවරයා වැඩිදුරටත් පැවසීය.