අද පාර්ලිමේන්තුවේ සම්මත වූ අතුරුදන් වූවන් පිළිබඳ කාර්යාලය පිහිටුවීමේ පනත දෙමළ ඩයස්පෝරාව ආදී බෙදුම්වාදීන්ට මෙන්ම ඔවුන්ට අවැසි පරිදි අපේ රටට එරෙහිව මානව හිමිකම් මුවාවෙන් රට අස්ථාවර කිරීමට ක්‍රියාකරන මානව හිමිකම් සමුළුව හරහා ක්‍රියාත්මක වන්නක් බව ජාතික හිමිකම් සංවිධානයේ සභාපති බෙංගමුවේ නාලක හිමියෝ කියති.

පසුගිය වසරේ රජය වෙනුවෙන් මංගල සමරවීර අත්සන් කළ මානව හිමිකම් කාර්යාලයට ඉදිරිපත් කළ ඇමරිකා යෝජනාවලියේ ජාත්‍යන්තර යුද අධිකරණය පිහිටුවීම, සත්‍ය සෙවීමේ කොමිසම, සහන සැලසීමේ ක්‍රියාවලිය හා අතුරුදන් වූවන් පිළිබඳ කාර්යාලය පිහිටුවීම යන කරුණු හතරම ඇතුළත් බවත් ඒ හිමියෝ නිවේදනයක් නිකුත් කරමින් කියයි.

එම කාර්යාලයට අධිකරණයට සමාන බලතල හිමි බවත් සාක්කි ලෙස විදෙස් රටවල සිට වීඩියෝ එවිය හැකි බවත් එම කාර්යාලය ගොනු කරන කරුණුවලට කිසිවකුට එරෙහිවිය නොහැකි බවත් කියන ඒ හිමියෝ මෙය ත්‍රස්තවාදය තුරන් කළ රණවිරුවන්ට හා දේශපාලන නායකයින්ට දඬුවම් කිරීමට හා ත්‍රස්තවාදය සුරැකීමට මෙම කාර්යාලය ක්‍රියාත්මක වනු ඇති බවත් සඳහන් කරයි.