(සුජිත් හේවාජුලිගේ )

රජය රට  තවත් දින දහයක් වසා තැබීමට  ගත් තීරණය බොහෝ ප්‍රායෝගික යැයි  රාගම වෛද්‍ය පීඨයේ  ජ්‍යෙෂ්ඨ  මහාචාර්ය අර්ජුන ද සිල්වා මහතා ලංකාදීපයට පැවැසීය.

මේ ආකාරයට සංචරණ සීමා ක්‍රියාත්මක කළහොත් රටට ලබන නොවැම්බර් මාසය වනවිට   යම් සැනසිලිදායි  තත්වයක්  උදා වනු ඇතැයි  තමා විශ්වාස කරන බවද හෙතෙම සඳහන් කළේය.

කොවිඩ්  ආසාදිතයන් වාර්තාවීම එක්දහස් පන් සියයක  සීමාවට  ළඟාවූ පසු  රට යම් මට්ටමකට  විවෘත  කළ හැකි බව පෙන්වා දුන් ජ්‍යෙෂ්ඨ  මහාචාර්යවරයා එවැනි  ආසාදිතයන් සංඛ්‍යාවක් රෝහල් පද්ධතියට  දරාගැනීම අපහසු නොවනු ඇතැයිද  පැවසුවේය.

නිරෝධායන ඇඳිරි නීතිය ක්‍රියාත්මක වන අතරේදී  එන්නත්කරණය  කඩිනම් කළ යුතු බවත්  එන්නත  ජනගහනයෙන් සියයට අසූවක පමණ  පිරිසකට ලබා දෙන තුරු  සංචරණ සීමා යම් යම් මට්ටම්වලින් පවත්වා ගැනීම ඉතා වැදගත් බවත්   අර්ජුන ද සිල්වා මහතා ප්‍රකාශ කළේ‍ය.

එසේම රට විවෘත කිරීමට කලින්  ප්‍රායෝගික  සෞඛ්‍ය මාර්ගෝපදේශ මාලාවක්  හඳුන්වාදීම අත්‍යවශ්‍ය බව පැවසූ  මහාචාර්යවරයා සෞඛ්‍ය අංශ ඒ සඳහා  මේ මොහොතේ සිටම ක්‍රියාත්මක විය යුතු බවද   පැවසුවේය.

ඩෙල්ටා සැර කොරෝනා වයිරස ප්‍රභේදය  නිසා  එන්නත්කරණය  මෙසේ වේගවත්  කිරීමට සිදුවී ඇති බවත් රටේ රංචු ප්‍රතිශක්තියක්  ඇතිවන තුරු එන්නත්කරණ  වැඩපිළිවෙළ  අඛණ්ඩවම සිදු කිරීම  ඉතා වැදගත් බවත්  ඔහු වැඩිදුරටත් කීවේය.