(සිතුම් චතුරංග)

ජංගම දුරකථන අලෙවිකරන ස්ථානයක් පවත්වාගෙන යමින් මුලතිව් ප‍්‍රදේශයේ පාසල් සිසුන් වෙත අසභ්‍ය වීඩියෝ දර්ශන අලෙවි කළ බව කියන පුද්ගලයකු අද (23) ඔඞ්ඩුසුඩාන් නගරයේදී අත්අඩංගුවට ගත් බව මුලතිව් පොලිසිය කියයි.

පාසල් සිසුන් ඉලක්ක කරමින් සිදුකෙරෙන අසභ්‍ය වීඩියෝ බෙදාහැරීමේ ජාවාරමක් පිළිබඳ මුලතිව් කොට්ඨාස දූෂණ මර්දන අංශයට ලැබුණ තොරතුරකට අනුව සිදුකළ වැටලීමකදී සැකකරු අත්අඩංගුවටගත් බව පොලිසිය පැවසීය.

සැකකරු සතුව තිබී මෙරටදී රහසිගතව වීඩියෝ ගතකර ඇති බවට සැකකෙරන සිංහල හා ද්‍රවිඩ ජාතිකයින්ගේ අසභ්‍ය වීඩියෝ දර්ශන ඇතුළු වීඩියෝ පට 2000කට ආසන්න සංඛ්‍යාවක් හා එම වීඩියෝ දර්ශන ගබඩාකර තිබූ ලැප්ටොප් පරිඝණකයක් හා ෆ්ලෑෂ් ඩ‍්‍රයිව් දෙකක් පොලිසිය විසින් සොයාගනු ලැබීය.

පොලිසිය පැවසූයේ සැකකරු පාසල් සිසුන්ගේ ජංගම දුරකථනයට එක් වීඩියෝවක් ලබාදීම සඳහා රුපියල් 100ක මුදලක් අයකරන අතර තරුණයින් වෙත ෆ්ලෑෂ් ඩ‍්‍රයිව් සඳහා වීඩියෝ ලබා දෙන බවත්ය.

ජංගම දුරකථන අලෙවිකරණ ස්ථානය පොලිසිය වැටලුවහොත් එහි තිබෙන ප‍්‍රධාන පරිඝණක ක‍්‍රියාවිරහිතව පවතින බවට හැගවීම සඳහා සැකකරු භාවිතයට ගැනීමට නොහැකි පරිඝණක වෙළෙඳෙ සලෙහි තබා ඇති බවද පොලිසිය කීය.

අසභ්‍ය වීඩියෝ දර්ශණ සහිත ලැප්ටොප් පරිඝණකයද කොටස් ගලවා තිබෙන බැවින් යම් අවස්ථාවක පාසල් සිසුවකු පැමිණ අසභ්‍ය දර්ශන ඉල්ලා සිටියහොත් ලැප්ටොප් පරිඝණකය එකලස්කොට දර්ශන ලබාදෙන බවටද අනාවරණයවූ බව පොලිසිය වැඩිදුරටත් පැවසීය.