(බිමල් ශ්‍යාමන් ජයසිංහ)
 
පුද්ගලයකුගෙන් රුපියල් 2,000ක අල්ලස් මුදලක් ලබාගත් කුලියාපිටිය කරගහගෙදර සමෘද්ධි සංවර්ධන නිලධාරිවරයකු පොල්පිටිය සමෘද්ධි ප්‍රජා මූල බැංකුව අසළදී අද(19) අත්අඩංගුවට ගත් බව අල්ලස් හෝ දූෂණ චෝදනා විමර්ශන කොමිසමේ අධ්‍යක්ෂක ජ්‍යෙෂ්ඨ පොලිස් අධිකාරී ප්‍රියන්ත චන්දසිරි මහතා පැවසීය.
 
සැකකරු කුලියාපිටිය නැගෙනහිර ප්‍රාදේශීය ලේකම් කාර්යාලයට අනියුක්තව සේවයේ යෙදෙන්නෙකු බව ද පොලිසිය කියයි.
 
සමෘද්ධි සහනාධාර අනිවාර්ය ඉතුරුම් ගිණුමෙන් මුදල් ලබාගැනීමට අවශ්‍ය කටයුතු සලසා දෙන බවට පොරොන්දු වී තිබූ සැකකාර නිලධාරියා ඒ සඳහා රුපියල් 2,000ක මුදලක් ඉල්ලා ඇතැයි පොලිසිය කියයි.
 
එයින් රුපියල් 500ක මුදලක් මීට දින කිහිපයකට පෙර ලබාගෙන තිබූ සැකකරු ඉතිරි මුදල ලබාගනිද්දී අද අත්අඩංගුවට ගත් බව පොලිසිය කියයි.
 
සැකකරු කුලියාපිටිය අධිකරණයට ඉදිරිපත් කිරීමට නියමිතය.