(අජිත්ලාල් ශාන්තඋදය සහ  අරුණ එස් හේරත්)
මෙවර සිරිපා වන්දනාවාරය ආරම්භ කරමින් පැල්මඩුල්ල ගල්පොත්තාවල ශ‍්‍රී පාද රාජමහා විහාරස්ථානයේ මාස හයක කාලයක් තැන්පත් කරතිබු සධාතුක කරඬු, සුමන සමන් දේව ප‍්‍රතිමා සහ දේවාභරණ 02දා උදෑසන එළඹුන සුබ නැකැත් වේලාවන් තුනක දි මාර්ග තුනක් ඔස්සේ පෙරහර තුනකින් සිරිපා මළුව වෙත වැඩම කරවීම සිදු විණි.
ඒ වෙනුවෙන් පවත්වන පරිත‍්‍රාණ ධර්ම දේශනාව 01දා රාත‍්‍රී පැවැත්වුණ අතර එදින රාත‍්‍රී සුමන සමන්දේව ප‍්‍රතිමා සහ දේවාභරණ මහජනතාවට වැඳපුදා ගැනිමට අවස්ථාව සැලසිණි.
පුද පූජාවලින් පසු 02දා පාන්දර 05.01ට හැටන් මාර්ගයෙන් ගමන් ගන්නා රිය පෙරහර කුරුවිට, ඇහැලියගොඩ, අවිස්සාවේල්ල, යටියන්තොට, ගිනිගත්හේන, හැටන්, මස්කෙළිය හරහා නල්ලතන්නිය කරා ළාගවීමෙන් පසු නල්ලතන්නිය ශ‍්‍රීපාද බෞද්ධ මධ්‍යස්ථානයේ සිට මලූව කරා පාගමනින් වැඩම කරවනු ලැබීය.
රත්නපුර ශ‍්‍රී පලාබද්දල ඔස්සේ රජමාවතින් ගමන් ගන්නා රිය පෙරහර පෙවරු 06.01ට එළැඹි සුබ නැකතින්පැල්මඩුල්ල, රත්නපුර, මල්වල, ගිලීමලේ, හරහා ශ‍්‍රීපලාබද්දල දක්වා එම රිය පෙරහර ගමන් කරනු ලැබීය.  එතැන් සිට පාගමනින් මලූව කරා පෙරහරින් සධාතුක කරඬුව, දේවරූප සහ දේවාභරණ වැඩම කරවනු ලැබීය.
උදෑසන 07.54ට එළැඹි සුබ නැකතින් පිටත්වු රිය පෙරහර  ඕපනායක, බළන්ගොඩ, ඇල්ලෙඅරාව, පින්නවල, මාරතැන්න බගවන්තලාව, නෝර්වූඞ්, මස්කෙලිය හරහා නල්ලතන්නියට ළඟවීමෙන් පසු පාගමනින් මලූව කරා පෙරහරින් සධාතුක කරඩුව, දේවරූප සහ දේවාභරණ වැඩම කරවනු ලැබීය.