(යොහාන් භාසුර)

ශ්‍රී ලංකාව අතීතයේ සිට පවත්වාගෙන ආ නොබැදි විදේශ ප්‍රතිපත්තිය තව දුරටත් ආරක්‍ෂාකරගැනීමට වර්තමාන පාලකයන් කටයුතු කළ යුතු බවත් චීනයට අයත් ‘යුවාන් වැන්ග් 5’ නෞකාව සම්බන්ධ සිද්ධියේදී ජනාධිපති රනිල් වික්‍රමසිංහ මහතාට ශ්‍රී ලංකා පොදුජන පෙරමුණේ බැසිල් රාජපක්‍ෂ මහතා බලපෑම් කළේ නම් එය හෙළා දකින බවත් ලංකා කොමියුනිට් පක්ෂයේ ප්‍රධාන ලේකම් විශේෂඥ වෛද්‍ය ජී. වීරසිංහ මහතා අද (9) පැවසීය.

ශ්‍රී ලංකාව සහ චීනය අතර ද, ශ්‍රී ලංකාව සහ ඉන්දියාව අතර ද සම්බන්ධතාවට හානියක් නොවන ලෙස නෞකාව සම්බන්ධ ගැටලුව විසඳාගත යුතු බව කී විශේෂඥ වෛද්‍ය ජී. වීරසිංහ මහතා මෙම සිද්ධියේදී ඇමරිකානු අධිරාජ්‍යවාදී මැදිහත්වීම හෙළාදකින බව ද සඳහන් කළේය.

රුසියානු ගුවන් යානය සම්බන්ධ නඩුව ගාස්තුවලට යටත් ඉවත දමා මේ වන විට සති කීපයක් ගතවී තිබුණ ද රුසියාව සමඟ සම්බන්ධකම් යථාවත් කිරීමට ශ්‍රී ලංකා බලධාරීන් කටයුතු කර නොමැති බවත් රුසියානු ගුවන් යානයකට ඉදිරියේදී එවැනි සිද්ධියකට මුහුණදීමට සිදුනොවන බවට ලිපිය හැකි ඉක්මණින් රුසියාවට යොමු කළ යුතු බවත් වීරසිංහ මහතා කීය.

රට මුහුණ දී තෙල්, ගෑස් බෙහෙත් ආදි ප්‍රශ්නවලට මුහුණ දීමට ජාතික එකඟතා ආණ්ඩුවක් පිහිටුවිය යුතු බව කී වීරසිංහ මහතා සඳහන් කළේ එම ප්‍රශ්නවලට දීර්ඝ කාලීන විසඳුම්වලට යෑමට නම් අලුත් ජනවරමක් ඇති ආණ්ඩුවක් පිටිහුවිය යුතු බවත්ය.

ලක්‍ෂ සංඛ්‍යාවක් සහභාගි වූ අරගලයේ ඇතැම් සුළු අවස්ථා යොදාගනිමින් තරුණයන් අත්අඩංගුවට ගැනීමට හදිසි නීතිය යොදාගැනීමට විරෝධ දක්වන බව ද විශේෂඥ වෛද්‍ය ජී. වීරසිංහ මහතා වැඩි දුරටත් කීය.

ලංකා කොමියුනිට් පක්ෂයේ ප්‍රධාන ලේකම් විශේෂඥ වෛද්‍ය ජී. වීරසිංහ මහතා කොළඹදී විශේෂ මාධ්‍ය හමුවක් පවත්වමින් අද (9) එසේ පැවසීය.