(නිමන්ති රණසිංහ)

ආනයනය කරන ලද සුදුලූණු බහාලුම් දෙකක් අනුමැතියකින් තොරව පවරා ගැනීමේ සිද්ධියට අදාළව වරාය අධිකාරියට එරෙහිව ඉදිරිපත් කර ඇති පැමිණීල්ලක් ඉල්ලා අස්කර ගන්නා ලෙසට එම සිද්ධියේ පැමිණීලිකරුට දුරකතනයෙන් මරණීය තර්ජන එල්ල කළැයි කියන සිද්ධියක් සම්බන්ධයෙන් විමර්ශනයක් ආරම්භ කළ බව අපරාධ පරික්ෂණ දෙපාර්තමේන්තුව කොළඹ අතිරේක මහේස්ත්‍රාත් ලෝචනී අබේවික්‍රම මහත්මිය ඉදිරියේ අද (18) කරුණු වාර්තා කළේය.

එන්රිචර් ඉන්වෙස්මන්ට් ලංකා පුද්ගලික සමාගමේ සභාපතිවරයා වශයනේ කටයුතු කරන කමතවත්ත පාර, මාදිවෙල රාජගිරිය ප්‍රදේශයේ පදිංචි එච්. ද්ල්ශාන් අසංක අබේවර්ධන යන අය ඉකුත් 14 වැනිදා මෙම පැමිණීල්ල ඉදිරිපත් කර ඇතැයි අපරාධ පරික්ෂණ දෙපාර්තමේන්තුව අධිකරණයට දැනුම් දුන්නේය.

තමන් ආනයනය කළ එම සුදුලූණු බහාලුම් දෙක වරාය අධිකාරිය විසින් සතොස ආයතයට පවරා ඇත්තේ ඉකුත් සැප්තැම්බර් මස 09 වැනිදා බවට සදහන් කරමින් පැමිණිලිකරු අපරාධ පරික්ෂණ දෙපාර්තමේන්තුවට සිය පැමිණීල්ල ඉදිරිපත් කර ඇත්තේ ඉකුත් සැප්තැම්බර් මස 16 වැනිදා බව ද එම දෙපාර්තමේන්තුව අධිකරණයට කරුණු සදහන් කර තිබේ.

මෙම සිද්ධියට අදාළව ඉකුත් 10 වැනිදා නාදුනන පුද්ගලයකු තම ජංගම දුරකතනය ඇමතුමක් ලබා ගනිමින් ‘දින 10ක් ඇතුළතදී සියලු නඩු ඉවත්කරගන්නා ලෙසත්, එසේ නොකළ හොත් තමාගේ පවුලේ සියලු දෙනා කපා කොටා මරා දමන බවටත්’ තමන්ට තර්ජනය කළ බව පැමිණීලිකරු සිය පැමිණීල්ලෙන් ඉදිරිපත් කර තිබූ බවද අපරාධ පරීක්ෂණ දෙපාර්තමේන්තුව අධිකරණයට කරුණු සදහන් කර තිබේ.