(නයනජීව බණ්ඩාර,කේ.ඩී.දේවප්‍රිය)

කෘෂිකර්ම රාජ්‍ය අමාත්‍ය ශෂින්ද්‍ර රාජපක්ෂ මහතා ගමන් ගත් ඩිෆෙන්ඩර් වර්ගයේ රථයක් මැදගම ඔබ්බේගොඩ පුබ්බාර ඔය හරහා ඇති සපත්තු පාලමක් මතින් ගමන් කරද්දී එකවර ජල පහරකට අසුව ගසා ගෙන ගොස් ඇතැයි මැදගම පොලිසිය කියයි.

බිබිල මැදගම ප්‍රදේශයේ පැවැති  උත්සව කීපයකට සහභාගී වී ආපසු මොනරාගල දක්වා ගමන් කරමින් සිටියදී අමාත්‍යවරයා මෙම අනතුරට පත්ව තිබේ.

අධිකවර්ෂාවත් සමග පුබ්බාර ඔයේ ජලමට්ටම ඉහළ ගොස් ඇති අතර සපත්තු පාලමෙන් ගමන් කරද්දී ඩිපෙන්ඩර් රථය සමග ඇමැතිවරයා ගසාගෙන ගොස් ඇත. එම අවස්ථාවේදී ප්‍රදේශවාසීන් ඇතුළු පිරිස මැදිහත් වී අමාත්‍යවරයා ගමන්ගත් වාහනය බේරාගෙන තිබේ.

අනතුරින් ඇමැතිවරයාට හෝ කිසිවකුටත් තුවාල සිදුව නැත.

තමන් මුහුණ දුන් ත්‍රාසජනක සිද්ධිය සම්බන්ධයෙන් අදහස් දැක් වූ රාජ්‍ය අමාත්‍ය ශෂේන්ද්‍ර මහතා මෙසේ කීය.

බිබිලේ ජනතා සේවයකට ගොස් ආපසු එන අතර තුර හිතාගන්නවත්  බැරි විදුහට එකවර සුනාමියක් වගේ ජල කඳක් ආවා. අප ගමන්ගත් ජීප් රථය කැරකැවුණා. මා දනගත් අනතුරක් කියල. රියදුරාටත් සහායකයා සමග ජිප් රියෙන් පැනගත්තා. අඩි හතරක පමණ ජල කඳකට අපි පැන්නේ. ඒ එක්කම ජිප් රථය අඩි 100ක් පමණ දුරකට දිය යටින්  ගහගෙන ගියා. ගහක පැටලිලා තිබුණු ජිත් රථය  පැයකට පමණ පසුව සොයාගත්තා. මේ වගේ අත්දැකීමක් කවදාවත් ලැබිලා නෑ. ඒක හරිම ත්‍රාසජනක අවස්ථාවක්.

කේ.ඩී.දේවප්‍රිය