(සුජිත් හේවාජුලිගේ)

සමෘද්ධි අරමුදලේ මුදල් රුපියල් කෝටි 4952 කට වැඩි මුදලක් විවිධ ස්ථානවල  ආයෝජනය කර තිබුණද ඒ  කිසිදු මුදලක් සම්බන්ධයෙන් විගණකාධිපතිවරයාට වාර්තා ඉදිරිපත් කර නොතිබූ බව ජාතික විගණන කාර්යාලය නිකුත් කළ වාර්තාවක සඳහන්වේ 

ඒ අනුව මෙමගින් රජයේ මුදල් අවභාවිතා වීද යන්න පරීක්ෂා කළ නොහැකිවීම හේතුවෙන් මෙම මුදල් රජයේ මූල්‍ය පාලනයෙන් බැහැර වී ඇති බව නිරීක්ෂණය වන්නේ යැයි  එම වාර්තාවේ දැක්වේ.

සමෘද්ධි සංවර්ධන දෙපාර්තමේන්තුවේ බැංකු මූල්‍ය අංශයේ  සතුව රක්ෂණ අරමුදල් ද ඇතුළුව ව්‍යවස්ථාපිත නොවන අරමුදල් පහළොවක් පවතින බවත් එයින් අරමුදල් නවයක් අක්‍රීය අරමුදල් බවත් විගණන කාර්යාලය පවසයි.

2023 වර්ෂයේදී සියයට 11හි සිට සියයට 26 දක්වා පොලී අනුපාතය යටතේ මෙම මුදල් අයර්ජනය කර තිබුණත් බැංකු වෙත ලබාදී තිබුණු පොලී අනුපාතිකය සියයට පහක් අඩු වූ බව නිරීක්ෂණය වී ඇත. මෙයින් සමෘද්ධිලාභීන්ට ගෙවිය යුතු පොලිය සියයට හතරක් බවත් අනිවාර්ය ඉතිරි කිරීම් මුදල් සෘජුවම බැංකු වෙත ප්‍රේෂණය නොකර බැංකු මූල්‍ය අංශය තුළ රඳවාගෙන ආයෝජනය කිරීමෙන් ප්‍රජා මූල බැංකු විසින්ම ආයෝජනය කර පොලී ආදායම උපයා ගැනීමේ අවස්ථාව අහිමිවීම නිසා එම මුදල් ජනතාවගේ ජීවනෝපාය සංවර්ධන කටයුතු සඳහා යොදා ගැනීමට ඇති අවස්ථාවද අහිමිව පැවතුණ බව එහි සඳහන් වේ.

සමෘද්ධි බැංකු සහ  බැංකු සමිතිවල  රුපියල් කෝටි 23 කට වැඩි මූල්‍ය  අක්‍රමිකතා 165 ක්  පිළිබඳව තොරතුරු වාර්තා වී ඇතැයි  ජාතික විගණන කාර්යාලය පවසයි.

මෙම අක්‍රමිකතා සිදුවී ඇතැයි පැවසෙන්නේ  2019 වර්ෂයේ සිට 2023 මාර්තු 31 දක්වා කාල පරිච්ඡේදයේදීය මින් අක්‍රමිකතා පහලවක විමර්ශන කටයුතු අවසන් කර නොතිබූ බවද එහි වාර්තාවක දැක්වේ.

නිලධාරීන් මෙසේ දිගින් දිගටම මූල්‍ය වංචා කිරීමට බැංකු පද්ධතිය තුළ පවතින අඩුපාඩු හා විනය නියෝග තුළින් දඬුවම් ලිහිල් වීමද හේතු වී තිබුණු බව විගණන කාර්යාලයේ නිරීක්ෂණයවී ඇත.