(සුජිත් හේවාජුලිගේ)

සෞඛ්‍ය අමාත්‍යාංශයේ නිලධාරියකු ලෙස පෙනී සිටිමින් වසර දහයකට අධික කාලයක් තිස්සේ එහි කටයුතු කර ඇතැයි පැවසෙන පුද්ගලයකු සම්බන්ධයෙන් අපරාධ පරීක්ෂණ දෙපාර්තමේන්තුව පරීක්ෂණයක් ආරම්භ කර ඇතැයි වාර්තාවේ.

මේ සම්බන්ධයෙන් ලැබුණු තොරතුරක් අනුව අපරාධ පරීක්‍ෂණ දෙපාර්තමේන්තුවේ නිලධාරීන් කණ්ඩායමක් සෞඛ්‍ය අමාත්‍යාංශයට ගොස් එම පුද්ගලයාගෙන් ඊයේ (20) පැය දෙකකට අධික කාලයක් තිස්සේ ප්‍රශ්න කර ප්‍රකාශයක් සටහන් කරගෙන ඇතැයි විශ්වාස කටයුතු ආරංචි මාර්ග සඳහන් කළේය.

මෙම පුද්ගලයා අමාත්‍යාංශයේ නිලධාරියෙකු ලෙස පෙනී සිටිමින් එහි නිලධාරී පත් කිරීම් ඇතුළු විවිධ කටයුතුවලට පවා සම්බන්ධවී කටයුතු කර ඇති බවට ලැබී ඇති තොරතුරක් සම්බන්ධයෙන්ද අපරාධ පරීක්ෂණ දෙපාර්තමේන්තුව කරුණු සොයා බලාගෙන යයි.

මොහු මේ ආකාරයට කටයුතු කිරීම අභිරහසක් හෙයින් ඒ සම්බන්ධයෙන් විමර්ශන නිලධාරීන්ගේ දැඩි අවධානය යොමුවී ඇතැයි දැනගන්නට ඇත.