(ඩයනා උදයංගනී)

පවතින ඉන්ධන අර්බුදය ලබන සතිය වන විට යම් තරමකට හෝ පාලනය කිරීමට හැකිවනු ඇතැයි සම කැබිනට් ප්‍රකාශක කෘෂිකර්ම, වනජීවී හා වන සම්පත් සංරක්‍ෂණ අමාත්‍ය, මහින්ද අමරවීර මහතා පැවසීය.

පෙට්‍රල් නෞකාවක් මෙම මස 23 වැනිදා හා ඩීසල් නෞකාවක් 24 වැනිදා ලැබීමට නියමිත බව කී ඇමතිවරයා ඒවා බෙදාහැරීම ආරම්භ කිරීමෙන් පසු සියයට 100ක් නැතත් පවතින තදබදය යම් තරමකට අඩුවනු ඇතැයි ඇමතිවරයා සඳහන් කළේය.

අත්‍යාවශ්‍ය සේවාවලට මෙන්ම කෘෂිකාර්මික, ධීවර ආදී කටයුතු ආදියට ප්‍රමුඛතාව දෙමින් මෙන්ම සලාක ක්‍රමවේදයක් හරහා එම ඉන්ධන බෙදාහැරීමෙන් අර්බුදය යම් තරමකට පාලනය කළ හැකි නමුත් ඉන්ධන එක්රැස්කිරීම් ආදිය පාලනය කිරීම සම්බන්ධයෙන් ගැටලු පවතින බව කීවේය.

එමෙන්ම ගෑස් අඩු මිලට ලබාදෙන සියෑම් සමාගමෙන් නොගෙන ඕමාන සමාගමකින් මිලදී ගැනීමට සිදුව ඇත්තේ සියෑම් සමාගම පොරොන්දු වූ දිනට ගෑස් ලබානොදුන් නිසා බව ද පැවසීය.

අමාත්‍යවරයා මේ බව පැවසුවේ රජයේ ප්‍රවෘත්ති දෙපාර්තමේන්තුවේදී අද පැවති කැබිනට් තීරණ දැනුම්දීමේ මාධ්‍ය හමුව අමතමිනි.