(මනෝප්‍රිය ගුණසේකර)

පාස්කු ඉරිදින ත්‍රස්ත ප්‍රහාරය සම්බන්ධයෙන් කොටුව මහේස්ත්‍රාත් අධිකරණයේ පෙනී සිටින ලෙස නියෝග කරමින් නිකුත් කළ සිතාසිය බල රහිත කරන නියෝගයක් නිකුත් කරන්නැයි ඉල්ලා හිටපු ජනාධිපති මෛත්‍රීපාල සිරිසේන මහතා ගොනු කළ රිට් පෙත්සම නව විනිසුරු මඩුල්ලක් හමුවේ පෙබරවාරි 06 වැනිදා සිට විභාගයට ගැනීමට අභියාචනාධිකරණය ඊයේ (28) දින නියම කළේය.

මෙම පෙත්සම විභාගයට ලැබූ විනිසුරු මඩුල්ලේ සාමාජිකයන් කිහිප දෙනෙකු ශ්‍රේෂ්ඨාධිකරණ විනිසුරුවරුන් ලෙස උසස්වීම් ලැබීම හේතුවෙන් පෙත්සම විභාග කිරීමට නව විනිසුරු මඩුල්ලක් පත් කිරීමට තීරණය කරනු ලැබමෙන් අනතුරුව එලෙස දින නියම කළේය.

අභියාචනාධිකරණ විනිසුරුවරුන් වන ධම්මික ගනේපොල සහ දමිත් තොටවත්ත යන මහත්වරුන් හමුවේ පෙත්සම කැඳවූ අවස්ථාවේදී එලෙස් දින නියම කරනු ලැබීය.

පාස්කු ඉරුදින සිදු වූ ත්‍රස්ත ප්‍රහාරය සම්බන්ධයෙන් සිරිල් ගාමිණී පියතුමා සහ එම ත්‍රස්ත ප්‍රහාරයට ලක් ව තුවාල ලැබූ ජේසුරාජ් ගනේෂන් නමැත්තා කොටුව මහේස්ත්‍රාත් අධිකරණයේ පෞද්ගලිකව පැමිණිලි ගොනු කර ඇතැයි සඳහන් කරන පෙත්සම්කාර හිටපු ජනාධිපතිවරයා සිද්ධිය සම්බන්ධයෙන් තමන් අපරාධ චෝදනා යටතේ සැකකරුවකු ලෙස නම් කරන්නැයි ඉල්ලා ඇතැයිද සඳහන් කර ඇත.

පැමිණිල්ල සලකා බැලූ කොටුව හිටපු මහේස්ත්‍රාත්වරයා එම පැමිණිලි සම්බන්ධයෙන් පසුගිය ඔක්තෝබර් 14 වැනිදා අධිකරණයේ පෙනී සිටින ලෙස නියෝග කරමින් තමන්ට සිතාසියක් නිකුත් කර ඇති බව සඳහන් කරන හිටපු ජනාධිපතිවරයා එම සිතාසිය අත්හිටුවන්නැයි ඉල්ලා මෙම රිට් පෙත්සම ගොනු කර ඇත.