(අංජුල මහික වීරරත්න)

ශ්‍රී ලංකා පොලීසිය ඉතාමත් ගෞරවාන්විත සේවාවක් බවට පරිවර්තනය කිරීම වෙනුවෙන් නිසි උසස්වීම් ක්‍රමවේදයක් සකස් කරන බව ජනාධිපති අනුර කුමාර දිසානායක මහතා පැවසීය.

ලබන වසරේ මැද පමණ වන විට අලුත් නිල ඇඳුමක් ලබා දීමට අපේක්ෂා කරන අතර, පොලීසියේ සියලු නිලධාරීන්ට අවදානම් දීමනාවක් ලබා දීමට මෙන්ම අවශ්‍ය යටිතල පහසුකම් සංවර්ධනය සහ මානව සම්පත බඳවා ගැනීමට අවශ්‍ය පියවර ගන්නා බව ජනාධිපතිවරයා කීය .

ජනාධිපතිවරයා මේ බව සඳහන් කළේ තිඹිරිගස්යාය ක්ෂේත්‍ර බලකා මූලස්ථානයේදී අද (03) පස්වරුවේ පැවති 160 වෙනි පොලිස් දින සැමරුම් උත්සවයට එක් වෙමිනි.

ගෙවී ගිය වසර 160ක කාලය තුළ රටේ ඇති වූ විවිධ ගැටුම්කාරි අවස්ථා, වසංගත ආදී පොදු ජනතාව ව්‍යසනයන්ට මුහුණ දුන් සෑම අවස්ථාවකම ශ්‍රී ලංකා පොලීසිය පොදු ජනතාව වෙනුවෙන් සහ මහජන සාමය සහ ආරක්ෂාව වෙනුවෙන් ඉටු කළ භාරදූර කාර්යභාරය මෙහිදී ඇගයීමට ලක් කළ ජනාධිපතිවරයා විවිධ යුගවල විවිධ කාර්යයන් වෙනුවෙන් කැපවූ ශ්‍රී ලංකා පොලීසිය වෙත මේ වන විට පැවරී ඇති ප්‍රමුඛතම වගකීම වන්නේ විෂ මත්ද්‍රව්‍ය ජාවාරම සහ ඒ හා බැඳුණු අපරාධ කල්ලි මැඩපැවැත්වීමේ ජාතික වගකීම බව පෙන්වා දුන්නේය. ඒ වෙනුවෙන් වෘත්තීය වගකීමෙන් එහා ගිය සමාජ වගකීමක් ලෙස සලකා කැපවන ලෙසද ජනාධිපතිවරයා සියලු දෙනාට ආරාධනා කළේය.