(නිමන්ති රණසිංහ)

බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් මහතාට පහරදී තුවාල කළැයි කොල්ලුපිටිය පොලීසිය අත්අඩංගුවට ගත් සැකකරුවන් තිදෙනකු හදුනාගැනීමේ පෙරට්ටුවකට ඉදිරිපත් කිරීම සදහා හෙට (12) දක්වා රක්ෂිත බන්ධනාගාර ගත කරන ලෙස කොළඹ අතිරේක මහේස්ත්‍රාත් ශලනී පෙරේරා මහත්මිය අද (11) නියෝග කළාය.

මෙලෙස රක්ෂිත බන්ධනාගාර ගත කරනු ලැබුවේ කොළඹ 02 පෙරහැර මාවත ආරලිගයහ මන්දිරය ආසන්නයේ රැදී සිටි විරෝධතාකරුවන් තිදෙනකි.

මෙම සිද්ධියට අදාළ සැකකරුවන් දෙදෙනකු කොල්ලුපිටිය පොලීසිය මගින් අද (11) ආවරණ සහිතව අධිකරණයට ඉදිරිපත් කර තිබිණී.

බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් මහතාට පහරදී තුවාල සිදුකළ බවට සැකපිට මෙම සැකකරුවන් දෙදෙනා සහ තවත් සැකකරුවකු ඊයේ (10) සවස එම ස්ථානයේදීම අත්අඩංගුවට ගත් බව කොල්ලුපිටිය පොලීසිය අධිකරණයට කරුණු ඉදිරිපත් කර ත’බිණී. මින් එක් සැකකරුවකු අසනීප තත්ත්වයක් හේතුවෙන් කොළඹ ජාතික රෝහලට ඇතුළත් කර ඇති බව මෙහිදී පොලීසිය අධීකරණයට දැනුම් දුන්නේය.

ඒ අනුව රෝහල්ගත කර සිටි සැකකරු නිරීක්ෂණය සදහා අද (11) සවස මහේස්ත්‍රාත්වරිය කොළඹ ජාතික රෝහලට ගියාය. එහිදී එම සැකකරු ද හෙට (12) දක්වා රක්ෂිත බන්ධනාගාර ගත කිරීමට මහේසත්‍රාත්වරිය එහිදී නියෝග කර සිටියාය.