(ඩයනා උදයංගනී)

කොවිඩ් අතරමැදි ප්‍රතිකාර මධ්‍යස්ථාන සහ නිරෝධායන මධ්‍යස්ථාන ලෙස පවත්වාගෙන ගිය ගුරු විද්‍යා පීඨ කිහිපයක නේවාසිකාගාරයන්හි තිබූ සිසුන්ගේ පොත් පත්, ඇඳුම් පැළඳුම් මෙන්ම වටිනා උපකරණ ඒවායේ රැඳී සිටි පුද්ගලයන් විසින් විනාශ කර ඇති බවට එම සිසුහු චෝදනා කරති.

තමන්ගේ ඇඳුම්, පොත්පත් තිබූ කබඩ් ආදියේ අගුලු මෙන්ම භාණ්ඩ දමා ඉබියතුරු පවා දමා තිබූ ගමන් බෑග ඉරා දමමින් භාණ්ඩ එළියට ඇද දමා ඇතැයි එම සිසුහු පවසති.

මේ සම්බන්ධයෙන් අදහස් දැක්වූ ශිෂ්‍යාවක් පැවසුවේ විද්‍යාපීඨ වෙත යාමේදී බොහෝ දෙනෙකුට අවශ්‍ය භාණ්ඩ ලබාගෙන ඇත්තේ දෙමාපියන් ණය වෙමින් බවයි.

එසේ ලබාගත් ඇඳුම් පැළඳුම්, පොත්පත් ආදිය මෙසේ විනාශ කර දැමීමෙන් එම සිසුන් දැඩි දුෂ්කරතාවකට පත්ව සිටින බව ද ඇය කීවාය.

විශේෂයෙන්ම පුලතිසිපුර, රුවන්පුර සහ සියනෑ යන විද්‍යාපීඨයන්හි සිසුන්ගේ භාණ්ඩ මෙසේ විනාශ කර දමා ඇති අයුරු දැක්වෙන වීඩියෝ සහ ඡායාරූප මේ දිනවල සමාජ මාධ්‍යවල ද පළ වී තිබේ.

වසරක පමණ කාලයක් නිරෝධායන මධ්‍යස්ථාන ලෙස පවත්වාගෙන ගිය මේවායේ කොවිඩ් ආසාදිත වූ බන්ධනාගාර රැඳවියන්, යාචකයන් ආදීන් රඳවා සිටි බව වාර්තා වේ.

මෙට්ට, මදුරුදැල් ආදිය ද විනාශ කර ඇති බවත්, විදුලි ස්ත්‍රික්ක ආදිය ඒවායේ රැඳී සිටි පුද්ගලයන් රැගෙන ගොස් ඇති බවත් ඇය කීවාය.

මේ සම්බන්ධයෙන් අප කළ විමසීමකදී අදහස් දක්වමින් ලංකා ගුරු සංගමයේ ප්‍රධාන ලේකම් මහින්ද ජයසිංහ මහතා පැවසුවේ තමන්ගේ නේවාසිකාගාරවල තිබූ භාණ්ඩ විනාශවීම හේතුවෙන්ගැටලු රැසක් නිර්මාණය වී ඇති බවයි.

පාසල්වල ප්‍රාථමික ශ්‍රේණි පවා ආරම්භ කර ඇතත් මෙතෙක් විද්‍යාපීඨවල කටයුතු ආරම්භ කර නැත්තේ මේ තත්වය හේතුවෙන් විය යුතු බව ද ලේකම්වරයා කීවේය.

එම සිසුන්ගේ දෙමාපියන් ලබාදුන් උපකරණ සියල්ල විනාශ වී ඇති මෙම අවස්ථාවේ ඔවුන්ට රජයෙන් සාධාරණ වන්දියක් ගෙවිය යුතු බවද ඔහු කීවේය.

මේ සම්බන්ධයෙන් කළ විමසීමකදී අධ්‍යාපන අමාත්‍යාංශයේ ප්‍රකාශකයෙක් පැවසුවේ මෙම සිසුන්ගේ නැති වී හා විනාශ වී ඇති භාණ්ඩ පිළිබඳ ලේඛන විද්‍යාපීඨ පාලනාධිකාරිය හරහා ලබාගනිමින් සිටින බවයි.

මෙම සිද්ධීන් සම්බන්ධයෙන් සොයාබැලීමක් කරන බව ද ඔහු කීවේය.