(අංජුල මහික වීරරත්න)

ජාතික නාමල් උයන' ජාතික උරුමයක් ලෙස ප්‍රකාශයට පත් කිරීමට කැබිනට් අනුමැතිය ලැබී ඇත.

ශ්‍රී ලංකාවේ විශාලතම නා වනාන්තරය ලෙස සැලකෙන,සංරක්ෂිත වනාන්තරයක් බවට ප්‍රකාශයට පත් කොට ඇති, හෙක්ටයාර 602 ක පමණ භූමි ප්‍රමාණයක පැතිරී පවතින ' ජාතික නාමල් උයන', ශ්‍රී ලංකාවේ වැදගත්ම හා ඓතිහාසික පුරාවිද්‍යාත්මක වටිනාකමින් යුත් ස්ථානයක් ලෙස හඳුනා ගෙන ඇත.

නාමල් උයනෙහි පිහිටි රෝස තිරුවාණා කඳුවැටිය ශ්‍රී ලංකාවේ ඉතා වැදගත් භූ - ස්වභාවික උරුමයක් වේ. රෝස තිරුවාණා කඳු වැටියට අනන්‍ය වූ ඛනිජ හා විද්‍යාත්මක වටිනාකමින් යුතු ලක්ෂණ, විශේෂිත වියළි කලාපීය වනාන්තර පරිසර පද්ධතිය සහ පුරාණ බෞද්ධ ආරාමවල භූ දර්ශන යන සියලු සාධක දිගු කාලීන සංස්කෘතික සම්බන්ධතා සමඟ සම්බන්ධ වී භුවිද්‍යාත්මක, පාරිසරික සහ සංස්කෘතික උරුම වටිනාකම්වල දුර්ලභ එකතුවක් ලෙස සලකමින් ජාතික නාමල් උයන, ජාතික උරුමයක් ලෙස ප්‍රකාශයට පත් කිරීම යෝග්‍ය බව ශ්‍රී ලංකාවේ ජාතික උරුම හඳුනා ගැනීම සඳහා වන විද්වත් අනුකමිටුව විසින් නිර්දේශ කරනු ලැබ ඇත. 

එකී නිර්දේශය මත පදනම්ව, ' ජාතික නාමල් උයන' ජාතික උරුමයක් ලෙස ප්‍රකාශයට පත් කිරීම පිණිස බුද්ධ ශාසන, ආගමික සහ සංස්කෘතික කටයුතු අමාත්‍යවරයා  සහ පරිසර අමාත්‍යවරයා  ඉදිරිපත් කළ ඒකාබද්ධ යෝජනාව අමාත්‍ය මණ්ඩලය විසින් අනුමත කරන ලදී.