(මුදිතා දයානන්ද)

වත්මන් ජනාධිපති ඉල්ලා අස්වන්නේ නම් රටේ වගකීම බාරගන්න අපි සුදානම් යැයි ජාතික ජනබලවේගයේ නායක අනුර දිසානායක මහතා පවසයි.

වත්මන් ජනාධිපති යටතේ සර්වජන හෝ අන්තර්කාලීන හෝ කුමන ආකාරයේ පාලනයක් ඇති කරන්නට උත්සාහ කළද එය ජනතාව පිළිනොගන්නා තත්වයක් මතුව තිබෙනවා. ඒ නිසා පළමුව ජනතාව ප‍්‍රතික්ෂේප කරන ජනාධිපති ගෝඨාභය රාජපක්ෂ සිය ධූරයෙන් ඉවත් විය යුතු බව එම යෝජනාවලියෙහි පළමු පියවර ලෙස ඉදිරිපත් කරමින් අනුර කුමාර දිසානායක මහතා කියයි. 

එසේ ජනාධිපති ඉවත් වු පසු දැනට අගමැතිවරයකු නොමැති තත්වයක් තුළ ව්‍යවස්ථාවේ පවතින ප‍්‍රතිපාදන අනුව කථානායකවරයා තාවකාලික වැඩබලන ජනාධිපති ලෙස කටයුතු කළ යුතු බවද එහි දෙවන යෝජනාව ලෙස ඉදිරිපත් කර ඇත.

මාස හයක් තුළ ජනාධිපතිවරණයක් පැවැත්විමෙන් නව පාලනයකට ඉඩදිය යුතු බවද ඒ අතරතුර කාලයේ වත්මන පාර්ලිමේන්තුවේ සෙසු පක්ෂ සහය දෙන්නේ නම් පමණක් තම පක්ෂය රටේ වගකිම භාරගන්නාවා. එසේ නොවන්නේ නම් සෙසු පක්ෂවලට අන්තර්කාලින පාලනයක් පිහිටුවා ගන්නට ඉඩ දි විපක්ෂයේ සිට රට ගොඩනැගිමට අවශ්‍ය සහය ලබාදෙන බවද අනුර දිසානායක මහතා සිය වැඩපිළිවෙල ඉදිරිපත් කරමින් සඳහන් කළේය.

මැතිවරණය පවත්වන කාලය දක්වා තාවකාලික ජාතික ජනබලවේගයේ ප‍්‍රධානත්වයෙන් තාවකාලික පාලනයක් ඇති කරන්න සූදානම් එසේ නොවන්නේ නම් වත්මන් පාර්ලිමේන්තුව තුළ අන්තර්කාලීන පාලනයක් ඇති කරන්න පුලූවන් අපි විපක්ෂයේ සිට අවශ්‍ය සහය ලබාදෙන්න සූදානම්

ඉහත කුමන ආකාරයෙන් පත්වන අන්තර්කාලීන ආණ්ඩුව විසිඑක්වන ව්‍යවස්ථා සංශෝධනය ගෙනවිත් වත්මන් ජනාධිපතිගේ හා අනාගතයේ බිහිවන ජනාධිපතිවරුන්ගේ බලතල සිමා කරන යෝජනා මූලික අවශ්‍යතා සපුරන වැඩපිළිවෙලක් ක‍්‍රියාත්මක කළ යුතුයි.

ජනමත විචාරණයත් මැතිවරණයත් දෙකම එකවර පැවැත්විය යුතුයි මාස හය කාලය තුළ එළියේ සිටින අරගලකරුවන්ද නියෝජිතයන් වෘත්තියවේදින් සිවිල් සංවිධාන වලින් යුත් අධීක්ෂන මණ්ඩලයක් පත් කළ යුතුයි.

රටේ වත්මන් අර්බුදය විසඳිම සඳහා ජාතික ජනබලවේගයේ විසඳුම් යෝජනාවලිය ඉදිරිපත් කරමින් ඔහු මේ බව සඳහන් කළේය.

එම යෝජනාවලිය ඉදිරිපත් කරනු ලැබුවේ පැලවත්තේ පිහිටි ජනතා විමුක්ති පෙරමුණේ ප‍්‍රධාන කාර්යාලයේදි පැවති විශේෂ මාධ්‍ය හමුවකදීය.