(ගයාන් සූරීය ආරච්චි)

අක්කර බදු ගෙවූ බවට කුවිතාන්සියක් ලබාදී වගා කටයුතු කරගෙන යෑම සඳහා අවශ්‍ය පහසුකම් සලසා දීම සඳහා රුපියල් ලක්ෂ විසිදෙකක මුදලක් අල්ලස් වශයෙන් ලබා ගත් බවකියන දියලුම ගොවි ජන සේවා මධ්‍යස්ථානයේ පර්යේෂණ හා නිෂ්පාදන සහකාරවරයෙකු අත්අඩංගුවට ගත් බව අල්ලස් හෝ දූෂණ චෝදනා විමර්ශන කොමිෂන් සභාව පවසයි.

ඇතිලිවැව ප්‍රදේශයේ හෝටලයක් තුළදී  අල්ලස් මුදල් ලබා ගැනීමේදී අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් සැකකරු වත් අඩංගුවට ගනුලැබීය.

රජයට අයත් අක්කර විස්සක පමණ ඉඩමක පැමිණිලිකරු අක්කව දොළහක පමණ ප්‍රමාණයක වගා කර තිබූ අතර ඒ සඳහා අක්කර බදු ගෙවූ බවට  කුවිතාන්සියක් නිකුත් කර අවශ්‍ය පහසුකම් සලසා දීම සඳහා  රුපියල් ලක්ෂ තිස්පහක මුදලක් සැකකරු මුලින් ඉල්ලා තිබූ අතර ඉන් ලක්‍ෂ දහයක මුදලක් ලබාගෙන තිබූ බවද විමර්ශනවලදී අනාවරණය වී ඇත.

අනතුරුව සැකකරු තවත් ලක්ෂ දොළහක මුදලක් පැමිණිලි කරුගෙන් ඉල්ලා ඇති අතර එම ලක්ෂ දොළහ මුදල ඇතිලි වැව ප්‍රදේශයේ හෝටලයක්් තුළදී  ලබා ගැනීමේදී මෙසේ අත්අඩංගුවට ගෙන ඇත.