(බී ජී චතුරංග)

කන්කසන්තරයේ සිට කොළඹ බලා ධාවනය වූ රාත්‍රී තැපැල් දුම්රියේ ගමන් කළ මගීන් 700කට ආසන්න පිරිසක් අද අලුයම සිට අනුරාධපුර දුම්රිය ස්ථානයේ කොටුවී ඇතැයි දුම්රිය දෙපාර්තමේන්තු ආරංචි මාර්ග කියයි.

එම මගීන්ට පිසූ ආහාර සහ සනීපාරක්ෂක කටයුතු සපයමින් සිටින බව අනුරාධපුර නගරාධිපති එන්.කරුණාරත්න මහතා සඳහන් කළේය.

ඒ මහතා මේ බව සඳහන් කළේ එම දුම්රිය මගීන්ගේ සනීපාරක්ෂක කටයුතු සොයා බැලීම සඳහා අනුරාධපුර නාගරික කොමසාරිස් රෝයි නිශාන්ත, සහ මහජන සෞඛ්‍ය පරීක්ෂක නුවන් කුලතුංග මහතා සමග අනුරාධපුර දුම්රිය ස්ථානයේ සිදු කළ නිරීක්ෂණ චාරිකාවකදීය.

පවතින ආපදා තත්ත්වය හමුවේ මෙරට දුම්රිය මගින් මෙන්ම විදෙස් සංචාරකයන් පිරිසක්ද අනුරාධපුර දුම්රිය ස්ථානයේ රැඳී සිටින බවත් ඔවුන්ට අවශ්‍ය සනීප ආරක්ෂක කටයුතු ආහාර පාන ඇතුළු මූලික අවශ්‍යතා සැපයීමට ප්‍රවාහන අමාත්‍ය බිමල් රත්නායක මහතා උපදෙස් ලබා දුන් බවද නගරාධිපතිවරයා සඳහන් කළේය.

අවහිරතාවයට පත්ව ඇති මාර්ගවල ජලය බැස යාමෙන් අනතුරුව එම දුම්රිය මගින් බස් රථ මාර්ගයෙන් කොළඹ දක්වා ප්‍රවාහනය කිරීමට අවශ්‍ය පහසුකම් සැලසීමට මාර්ගස්ථ මගී ප්‍රවාහන අධිකාරිය අවශ්‍ය කටයුතු සැලසුම් කරමින් සිටින බවද නගරාධිපතිවරයා පැවසීය.