(ගයාන් සූරියආරච්චි සහ බිමල් ශ්‍යාමන් ජයසිංහ)

හිටපු ජනාධිපති රනිල් වික්‍රමසිංහ මහතාගේ ‘‘උරුමය‘‘ වැඩසටහන යටතේ ස්ථිර ඔප්පු ලබා දෙන බවට පොරොන්දු වී පුද්ගලයන් විශාල පිරිසකගෙන් රුපියල් 98,430,000/= ක ( රුපියල් නවකෝටි අසු හතර ලක්ෂ තිස් දහසක මුදලක්.) වංචා කළ ව්‍යාපාරික කාන්තාවක් අත්අඩංගුවට ගත් බව අපරාධ පරීක්ෂණ දෙපාර්තමේන්තුව කියයි.

මෙලෙස අත්අඩංගුවට ගෙන ඇත්තේ , දෙවන පියවර තරුණ ගොවි ව්‍යාපාර,බකමූණ ප්‍රදේශයේ පදිංචි මැණික් හා ඉඩම් විකිණීමේ ව්‍යාපාරයක් සිදු කරන කාන්තාවකි.

හිටපු ජනාධිපති රනිල් වික්‍රමසිංහ මහතා ජනාධිපතිව සිටියදී ඔප්පු නොමැතිව වසර ගණනාවක් පදිංචිව සිටි පවුල් සඳහා උරුමය වැඩසටහන යටතේ ඔප්පු ලබාදීමේ වැඩසටහනක් ක්‍රියාවට නැංවූ අතර ඒ මුවාවෙන් සැකකාරිය ස්ථිර ඔප්පු ලබාදෙන බවට පොරොන්දු වී කල්මුණේ ප්‍රදේශයේ පුද්ගලයන් 164 කුගෙන් රුපියල් 98,430,000/= ක මුදලක් ලබාගෙන විශ්වාසය කඩ කර මුදල් වංචා කළ බවට අපරාධ පරීක්ෂණ දෙපාර්තමේන්තුවේ වාණිජ අපරාධ විමර්ශන අංශ (1) වෙත පැමිණිලි ලැබී තිබිණි.

ඒ අනුව විමර්ශන පැවැත්වූ වාණිජ අපරාධ විමර්ශන අංශ (1) නිලධාරීන් එම සැකකාරිය අපරාධ පරීක්ෂණ දෙපාර්තමේන්තුවේ එම අංශය වෙත කැඳවා ප්‍රකාශ ලබා ගැනීමෙන් අනතුරුව අත්අඩංගුවට ගෙන ඇත.