(අංජුල මහික වීරරත්න)

හදිසි ආපදා තත්ත්වය හේතුවෙන් පීඩාවට පත් වී ඇති ජනතාවට කඩිනමින් සහන සැලසීමට කැබිනට් අනුමැතිය ලැබී ඇත.

අයහපත් කාලගුණ තත්ත්වය හේතුවෙන් පැන නැඟී ඇති හදිසි ආපදා තත්ත්වය සැලකිල්ලට ගෙන, 2025-11-21 දින සිට නැවත දැනුම් දෙනතුරු විස්තීරණ ආපදා තත්ත්වයක් රජය විසින් ප්‍රකාශයට පත් කර තිබේ. එම ආපදා තත්ත්වය හේතුවෙන් පීඩාවට පත් වූ ජනතාවගේ ජන ජීවිතය යථා තත්ත්වයට පත් කිරීම සඳහා අවශ්‍ය කඩිනම් සහන සහ පහසුකම් සැපයීමේදී අනුගමනය කළ යුතු ක්‍රම වේදය පිළිබඳව ප්‍රසම්පාදන කොමිෂන් සභාවේ එකඟතාව ද සහිතව දිස්ත්‍රික් ලේකම්වරුන්ට සහ ප්‍රාදේශීය ලේකම්වරුන්ට අවශ්‍ය උපදෙස් නිකුත් කරමින් අයවැය චක්‍රලේට 05/2025 සහ අවශ්‍ය ප්‍රසම්පාදන කටයුතු බාධාවකින් තොරව සිදු කිරීම සඳහා සියලුම අමාත්‍යාංශ ලේකම්වරුන් හා පළාත් ප්‍රධාන ලේකම්වරුන් වෙත බලය පවරමින් අයවැය චක්‍රලේඛ 06/2025 භාණ්ඩාගාරයේ ලේකම් විසින් නිකුත් කරනු ලැබ ඇත.

ආපදා සහන සේවා සහ හදිසි ප්‍රතිචාර වෙනුවෙන් 2025 අනුමත අයවැය ඇස්කමේන්තු මඟින් වෙන් කර ඇති ප්‍රතිපාදන වලට අමතරව තවත් රුපියල් මිලියන 550 ක අතිරේක ප්‍රතිපාදන දැනටමත් සලසා තිබේ. එමෙන්ම, ආපදාවට පත් ජනතාවට වියළි ආහාර සඳහා පවුලක සාමාජිකයින් ගණන මත පදනම්ව සතියකට මෙතෙක් ගෙවනු ලැබූ රුපියල් 1,800 සිට රුපියල් 3,600 දක්වා වූ මුදල, රුපියල් 2,100 සිට රුපියල් 10,500 දක්වා වැඩි කිරීමට ද අනුමැතිය ලබා දී තිබේ.

ඒ අනුව, අවශ්‍ය පියවර ගැනීම සඳහා සහ ආපදා තත්ත්වය හේතුවෙන් බිඳ වැටී ඇති ජන ජීවිතය යථා තත්ත්වයට පත් කිරීම සම්බන්ධයෙන් තවදුරටත් අවශ්‍ය වන අනුමැතින්, මාර්ගෝපදේශ සහ අතිරේක ප්‍රතිපාදන සලසා දීම සඳහා භාණ්ඩාගාරයේ ලේකම් වෙත බලය පැවරීම පිණිස මුදල්, ක්‍රම සම්පාදන සහ ආර්ථික සංවර්ධන අමාත්‍ය වශයෙන් ජනාධිපතිවරයා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.