( රොමේෂ් මධුෂංඛ)

අනුරාධපුර ඥානඅක්කාගේ නිවසට, දේවාලයට සහ හෝටලයට අද (10) අලුයම් කාලයේදී කඩා වැදුණු අරගලකරුවන් ගිනිතබා සම්පූර්ණයෙන්ම විනාශ කර ඇතැයි පොලීසිය කියයි.

අනුරාධපුර ඉසුරුපුර ප්‍රදේශයේ පිහිටි ඥානක්කා නැමති කාන්තාවගේ නිවස ඉදිරිපිට අරගලකරුවන් පැමිණේවි යන අවදානම හේතුවෙන් යුදහමුදාවේ 200 කට ආසන්න පිරිසක් කැඳවා ආරක්ෂාවටද යොදවා තිබීම විශේෂත්වයක් විය.

කෙසේ වෙතත් අරගලකරුවන් අද අලුයම 1ට පමණ පළමුව ඥානක්කාගේ නිවසට කඩා වැදුණු අතර එහිදී යුදහමුදාවේ සෙබලු පළමුව නිවස ආරක්ෂා කිරීමට පියවර ගත්තද පසුව අරගලකරුවන් ඥානක්කාගේ නිවස වටා ඉදිකොට තිබූ බැම්ම කඩා ඇතුලු වීමත් සමග යුදහමුදාව පසෙකට වූහ.

අනතුරුව අරගලකරුවන් විසින් ඥානක්කාගේ නිවසේ බඩු බාහිරාදියද සමහරක්  ගම්වාසීන්ට බෙදා දීමෙන් පසුව නිවසට ගිනිතැබීම සිදුකළ අතර නිවස සම්පූර්ණයෙන්ම විනාශ වීි තිබේ.

ඉන්පසුව දේවාලයට කඩා වැදුණු අරගලකරුවන් එහිදී ආගමික පිළිම කිසිවකටත් හානි සිදු නොකළ අතර දේපලවලට පමණක් හානි කර ඉවත්වූහ.

අවසානයේ නුවර මාර්ගයේ පිහිටි ඥානක්කාගේ බවට සැලකෙන හෝටලයට කඩාවැදුනු අරගලකරුවන් විසින් හෝටලයේ සියලුම දේපල කඩා විනාශ කොට ගිනිතැබීය.

කෙසේ වෙතත් ඥානක්කාගේ නිවසට තිබූ ආරක්ෂාව නිවසට ගිනිතැබීමෙන් අනතුරුව දේවාලයට සහ හෝටලයට ලබා නොදී ආරක්ෂාක අංශ ඉවත්වීමටද පියවර ගෙන තිබුණි.