සිතුම් චතුරංග සහ රොමේෂ් මධුසංක
 
වවුනියාව නගරයේ පිහිටි රජයේ ඉන්ධන ගබඩා සංකීර්ණයෙන් ඩීසල් සහ භූමිතෙල් ඇතුළු ඉන්ධන ලීටර 2800ක් සොරකම් කිරීමේ සිද්ධිය සම්බන්ධයෙන් එහි ප්‍රධාන ලිපිකරු ඇතුළු   නවදෙනකු    අත්අඩංගුවටගත් බව වවුනියාව පොලිසිය කියයි.
 
අත්අඩංගුවට ගෙන ඇති බවුසරය වවුනියාවේ පාර්ලිමේන්තු මන්ත්‍රීවරයකුට අයත් බවත් එම මන්ත්‍රීවරයාට ඉන්ධනහල් ඇති බවත් පොලිස් ආරංචි මාර්ග පවසයි.  
 
ලංකා ඛණිජ තෙල් සංස්ථාවේ වැටලීම් අංශ නිලධාරීන් කණ්ඩායමක්  ඉන්ධන සොරකමක් සම්බන්ධයෙන් වවුනියාව පොලිසිය වෙත කළ පැමිණිල්ලකට අනුව සිදුකළ වැටලීමකදී ඉන්ධන ලීටර 2800 රැගෙනයමින් තිබූ බවුසරයද අත්අඩංගුවටගත් බව පොලිසිය පැවසීය.
 
අත්අඩංගුවටගත් පිරිස අතර වවුනියාව රජයේ ඉන්ධන ගබඩා සංකීර්ණයේ ප්‍රධාන ගබඩා ආරක්ෂක නිලධාරී සහ  කම්කරුවන් සිව්දෙනකු ද  පුද්ගලික ඉන්ධන පිරවුම් හලක ඉන්ධන බවුසර් රථ රියදුරු සහ රිය සහයක  ද සිටින බව පොලිසිය කියයි.   සැකකරුවන් දීර්ඝ කාලයක සිට රජයේ ඉන්ධන ගබඩාවෙන් ඉන්ධන සොරාගෙන පුද්ගලික ඉන්ධන පිරවුම්හල් වෙත  අලෙවිකොට මුදල් ලබාගෙන ඇති බව පොලිසිය පවසයි.