(මනෝප‍්‍රිය ගුණසේකර)

බුත්තල දුටුගැමුණු පාසලේ ඉගෙනුම ලබමින් සිටින බාලවයස්කාර සිසුවකු පාසලෙන් ඉවත් කරගැනීමට දරුවාගේ පියාට බලපෑම් කළැයි කියන එම පාසලේ විදුහල්පතිවරයාට ලබන 28 වැනිදා  අධිකරණයේ පෙනී සිටින ලෙස නියම කරමින් වැල්ලවාය මහෙස්ත‍්‍රාත් කේසර සමරදිවාකර මහතා අද (22) නොතිසි නිකුත් කළේය.

එම සිසුවා පාසලෙන් ඉවත් කරගන්නා ලෙස බලපෑම් කර සිසුවා  අපහසුතාවයට හා වෙනස් සැළකීමට ලක්වීම යෝග්‍ය නොවන බව මහෙස්ත‍්‍රාත්වරයා නියම කර තිබියදීත් සිසුවා පාසලෙන් ඉවත් කරගන්නා ලෙස විදුහල්පතිවරයා තමාට බලපෑම් කළැයි දරුවාගේ පියා මහෙස්ත‍්‍රාත්වරයාට කළ දැනුම් දීමකට අනුව එලෙස නොතිසි නිකුත් කළේය.

බුත්තල දුටුගැමුණු පාසලේ විදුහල්පතිවරයාට ලබන 28 වැනිදා  අධිකරණයේ පෙනී සිටින ලෙස දැනුම් දෙමින් නිකුත් කළ නොතිසිය ක‍්‍රියාත්මක කිරීමට අවශ්‍ය පියවර ගන්නා ලෙස මහෙස්ත‍්‍රාත් කේසර සමරදිවාකර මහතා බුත්තල පොලිසියේ ස්ථානාධිපතිවරයාට නියම කළේය.

යම් සිද්ධියක් සම්බන්ධයෙන් අධිකරණය හමුවට මෙම සිසුවා ඉදිරිපත් කෙරුණු අතර එම සිද්ධියෙන් පසු සිසුවා පාසලෙන් ඉවත් කරගන්නා ලෙස විදුහල්පතිවරයා විසින් දරුවාගේ පියාට බලපෑම් කරනු ලැබ ඇති බව මීට පෙර අවස්ථාවකදී අනාවරණය විය.