(පුෂ්පකුමාර මල්ලවආරච්චි)

හෙරොයින් ළඟ තබා ගැනීම සම්බන්ධයෙන් අත්අඩංගුවට ගත් සැකකරුවකු පොලිස් ස්ථාන භූමියේ නවතා තිබූ  පොලිස් පරීක්ෂකවරයෙකුට අයත් යතුරැ පැදියක්ද සොරාගෙන පලා යාමේ සිද්ධියක් සම්බන්ධයෙන් කෙරෙන පරීක්ෂණයක් මත ‍අත්තනගල්ල සහකාර පොලිස් අධිකාරි ප්‍රභාත් දයානන්ද මහතා විසින් වේයන්ගොඩ පොලිසියේ උප පොලිස් පරීක්ෂකවරයකුගේ වැඩ තහනම් කර ඇත.
 
වේයන්ගොඩ පොලිසියේ නිලධාරී පිරිසක් විසින් පසුගියදා වඩුමුල්ල ප්‍රෙද්ශයේ පදිංචිකරැවෙකු හෙරොයින් ලග තබා ගැනීම සම්බන්ධයෙන් සැකපිට අත්අඩංගුවට ගෙන පොලිස් ස්ථානයට ඉදිරිපත් කර ඇත. 

පොලිස් ස්ථානයේ රදවා සිටි සැකකරු ඉඩ ලද අවස්ථාවක අත්අඩංගුවේන් මිදී පොලිස් ස්ථාන භූමියේ නවතා තිබූ යතුරැ පැදියක නැගී පලා ගොස් ඇත.
 
මෙම සැකකරැ මෙසේ රැගෙන ගොස් ඇත්තේ ඇදිරි නීතිය නිසා වේයන්ගොඩ පොලිස් ස්ථානයේ සේවයට වාර්තා කර සිටි කොළඹ පොලිසියක පොලිස් පරීක්ෂකවරයකුගේ යතුරු පැදියක් බව පසුව හෙලිවී ඇත. එහි යතුරු යතුරුපැදියේම රදවා තිබීම නිසා සැකකරුට එය සොරාගෙන යාමට රැකුලක්වී ඇතැයි මූලික පරීක්ෂණවලදී හෙලිවී ඇත.

අනතුරුව පොලිස් ස්ථාන බිමේ තිබූ යතුරු පැදිය සොරා ගැනීම හා අත්අඩංගුවේ සිටි සැකකරු පලා යාම සම්බන්ධයෙන් සිදු කෙරැනු පරීක්ෂනයක් මත ඒ අවස්ථාවේ රාජකාරියේ යෙදී සිටි උප පොලිස් පරීක්ෂකවරයාගේ වැඩ මෙසේ තහනම් කර තිබේ.
 
 වැඩ තහනමට ලක්ව ඇත්තේ මෑතකදී උසස්වීම් ලද නිලධාරියෙකු බව ජ්‍යෙෂ්ඨ පොලිස් නිලධාරියෙක් සදහන් කළේය.
 
 යතුරු පැදිය රැගෙන පලායන අතරතුර සැකකරු කිසියම් අපරාධයක් කර අැති බවට ලැබී ඇති ආරංචිවල සත්‍ය තාවය හෙලි කර ගැනීමටද පොලිසිය පරීක්ෂණ පවත්වයි.
 
පෙරේදා 16 පොලිස් ජිප් රිය දුටු පුද්ගලයකු යතුරු පැදියක් අතහැර දමා පලා ගෙස් ඇති අතර එය පොලිස් පරීක්ෂකවරයාගේ යතුරු පැදිය බව අනාවරණය වී ඇතැයිද කරුනු දැක්වූ ජ්‍යෙෂ්ඨ පොලිස් නිලධාරියා සදහන් කළේය.
 
පැදිය දමා පලා ගිය සැකකරු පසුව සිදු කෙරැනු පරීක්ෂණවලදී හෙලිවූ තොරතුරු මත   යලි අත්අඩංගුවට ගැනීමට පොලිසිය සමත්වී ඇත.හෙරොයින් ලග තබා ගැනීම, පොලිස් අත්අඩංගුවෙන් පලායිම හා සොරකම් කිරීම ඇතුලු චෝදනා යටතේ සැකකරු අධිකරණයට ඉදිරිපත් කිරීමට නියමිතය.