(විනීතා එම් ගමගේ)
 
ශ්‍රී ලංකා ජර්මානු කාර්මික අභ්‍යාස විද්‍යාලයේ දැනට වසා දමා ඇති බොරැල්ල ශාඛාව යළි ආරම්භ කිරීමට වෘත්තිය පුහුණු අමාත්‍යංශ්‍ය පියවර ගෙන ඇත.
 
වසර දෙකකට ආසන්න කාලයක් තිස්සේ එම ආයතනයේ  ගොඩනැගිලි හා එහි සම්පත් විනාශ මුඛයට යමින් පවතින බව වෘත්තිය පුහුණු අමාත්‍යංශයේ නිලධාරිහු එහි කළ නිරික්ෂණ චාරිකාවක දී දැකිය හැකි වී යැයි වෘත්තිය පුහුණු අමාත්‍යංශයේ නිලධාරියෙක් ලංකාදීපයට පැවසීය.
 
ශ්‍රී ලංකා ජර්මානු කාර්මික අභ්‍යාස ආයතනයේ ශාඛාවක් ලෙස 70 දශකයේ ආරම්භ වූ මෙම ආයතනය 2016 වසර දක්වා ක‍්‍රියාත්මක වූ අතර වසරකට සිසුන් අසූවක් පමණ වාහන නඩත්තු පාඨමාලා එහි දී හැදෑරියැයි ද එම නිලධාරියා කීය.
 
 එම සම්පත් යොදා ගනිමින් එකී ආයතනය යළි ආරම්භ කරන ලෙස නිපුණතා සංවර්ධන රැකී රක්ෂා හා කම්කරු සබදතා අමාත්‍ය දිනේෂ් ගුණවර්ධන මහාතා උපදෙස් දී ඇතැයි කී එම නිලධාරියා 2020 වසර වෙනුවෙන් එහි පාධමාලා ඇරඹීමටත් ත‍්‍රිරෝද රථ අලූත්වැඩියාව, යතුරු පැදි අලූත්වැඩියාව හා වාහන විදුලි පද්ධති නඩත්තුව හා අලූත් වැඩියාව යන පාඨමාලා ආරම්භ කිරීමට බලාපොරොත්තු වන බවද හෙතෙම කියා සිටියේය.
 

බොරැල්ල කොටා පාරේ පර්චස් 70 ක පමණ භූමි භාගයක පිහිටි මෙම ආයතනය ප‍්‍රධාන ගොඩනැගිලි දෙකක් ඇතුළු තවත් ගොඩනැගිලි කිහිපයකින් සමන්විත වන අතර එහි අතහැර දැමු යන්ත‍්‍රසූත‍්‍ර රැසක් ද වී යැයි කී එම නිලධාරියා එහි තිබු බොහෝ යන්ත‍්‍ර මොරටුවේ පිහිටි ජර්මානු කාර්මික අභ්‍යාස ආයතනය වෙත ගෙන ගොස් ඇතැයි ද පැවසීය.