(මනෝප‍්‍රිය ගුණසේකර සහ රන්ජන් කටුගම්පොළ)
 
කොළඹ මහ නගර සභාවේ හිටපු විපක්‍ෂ නායක අජන්ත ලියනගේ මහතාගේ පියා සිය නිවසේ නිදා සිටියදී ඔහුගේ හිසට වෙඩි තබා ඝාතනය කර රටින් පැන ගොස් වසර විසිදෙකකට පසු යළි ලංකාවට පැමිණ සිටියදී අල්ලා ගනු ලැබු විත්තිකරුට නියම කොට තිබු මරණ දඬුවම කොළඹ මහාධිකරණ විනිසුරු මනිලාල් වෛද්‍යතිලක මහතා ප‍්‍රකාශයට පත් කළේය.

විත්තිකරුට මීට වසර 23කට ඉහතදී මරණ දඩුවම නියම කොට තිබුණත් විත්තිකරු අධිකරණයට ඉදිරිපත් නොවී සැඟව සිටීම නිසා එම මරණ දඬුවම ප‍්‍රකාශයට පත් කිරීමට හැකියාවක් නොතිබිණි.

මෙලෙස මරණ දඬුවම නියම  කෙරුණේ වෑකඩ විතානච්චිගේ පේ‍්‍රමසිරි නැමැති අයට වේ.

එවකට පැමිණිල්ල වෙනුවෙන් පෙනී සිටි ජ්‍යෙෂ්ඨ රජයේ නීතීඥ සුහර්ෂි හේරත් මහත්මිය කරුණු ඉදිරිපත් කරමින් මෙම විත්තිකරු චෝදනාවන්ට වරදකරු කර මරණ දඬුවම නියම කොට ඇත්තේ 1994 මාර්තු මස 15 වැනි දා බව දැනුම් දුන්නාය.