(ඉන්දිකා රාමනායක)
 
ලංගම බස් රථයක් හා පෞද්ගලික බස් රථයක් මුහුණට මුහුණ ගැටීමෙන්  වස්කඩුවේ දී  සිදු වු අනතුර  ලංගම බස් රථයේ රියදුරුගේ දැඩි නොසැලකිල්ල  මත සිදු වී ඇතැයි  පරීක්ෂණ  වලදී හෙළි වු බව පොලිස් මාධ්‍ය ප‍්‍රකාශක පොලිස් අධිකාරි රුවන් ගුණසේකර මහතා පැවසීය.
 
ඇල්පිටියේ  සිට කොළඹ බලා ගමන්ගත් මෙම  ලංගම බස් රථය  වෙන් වාහනයකට ඉස්සර කිරීමට යාමේ දී ප‍්‍රතිවිරුද්ධ දෙසින් පැමිණි  පෞද්ගලික බස් රථයේ මුහුණට මුහුණ ගැටී ඇති බවද පොලිස් මාධ්‍ය ප‍්‍රකාශකවරයා කීය.
 
මෙම අනතුරින්   එම රියදුරු ඇතුලූ  6 දෙනෙක්ට දිවි අහිමි වු බවත් තවත් 62 නෙත් තුවාල ලබා ඇති බවද    ගුණසේකර මහතා පැවසීය.
 
මෙම වසරේ ජනවාරි මස 01 වැනි දින සිට අගෝස්තු  02 දින දක්වා  සිදු වු මාරක රිය අනතුරු වලින්  පුද්ගලයන් 1629 දෙනෙක් මියගොස් ඇති බව රුවන් ගුණසේකර මහතා කීය.
 
 මෙම මාරක රියඅනතුරු වලින් සියයට 60 ක ප‍්‍රමාණයක්   රියදුරන් අපරික්ෂාකාරි ලෙස රථ ධාවනය කිරීමෙන් සිදු වු  අනතුරු බවද පොලිසිය රුවන් ගුණසේකර මහතා කීය. රියදුරන් කල්පනාකාරි ලෙස රථ ධාවනය කරන්නේ නම් මෙම සියයට 60 ක අනතුරු ප‍්‍රමාණ්‍ය වලක්වා ගැනීමට හැකි වු බවද පොලිස් මාධ්‍ය  ප‍්‍රකාශකවරයා වැඩිදුරටත් පැවසීය.