විශ්වාසභංගයක් ගෙන ඒම ප්‍රජාතන්ත්‍රවාදී වශයෙන් යහපත් යැයි මෙරට සංචාරයක නිරත වී සිටින යුරෝපා සංගම් පාර්ලිමේන්තු නියෝජිත පිරිසේ සභාපති ජාන් සහ්රාදීල් මහතා කොළඹදී අද (5) පැවැසීය.
 
විපක්ෂය ආණ්ඩුවට එරෙහිව විශ්වාසභංගයක් ගෙන ඒමටත් ආණ්ඩුව ඊට ප්‍රතිචාර දැක්වීමටත් හැකිවීම ප්‍රජාතන්ත්‍රවාදී රටක ලක්ෂණයක් යැයි ද හෙතෙම කීය. යුරෝපා සංගම් පාර්ලිමේන්තු නියෝජිත පිරිස ශ්‍රී ලංකාවට පැමිණියේ ඉකුත් 4 වැනිදා වන අතර ඔවුන් හෙට (6) දක්වා මෙරට රැඳි සිටීමට නියමිතය. 
 
තවදුරටත් අදහස් දැක්වූ  යුරෝපා සංගම් පාර්ලිමේන්තු නියෝජිත පිරිසේ සභාපති ජාන් සහ්රාදීල් මෙසේ ද කීය.
 
   “ශ්‍රී ලංකාවේ විපක්ෂය ආණ්ඩුවට එරෙහිව විශ්වාසභංගයක් ගෙන ඒම ඉතාමත් හොඳ ප්‍රජාතන්ත්‍රවාදී ලක්ෂණයක්. විපක්ෂයට ආණ්ඩුවට එරෙහිව විශ්වාසභංගයක් ගෙන ඒමටත් ආණ්ඩුවට ඊට ප්‍රතිචාර දැක්වීම ශ්‍රී ලංකාව ප්‍රජාතන්ත්‍රවාදි ලක්ෂණයක් බව පෙන්නුම් කර තිබෙනවා. 

ඒ වගේම අපි මෙහිදි ජී.එස්.පී ප්ලස් සහනය සම්බන්ධයෙන් කියන්න කැමැතියි. ජී.එස්.පී සහනය ලබා දීමේදී අපි ඒ රටවල මානව හිමිකම්, පරිසරය ආරක්ෂා කිරීම, කම්කරු නීති යනාදි කරුණු සම්බන්ධයෙන් අවධානය යොමු කරනවා. ඕනෑම රටක් ජාත්‍යන්තර ප්‍රඥප්තීන්වලට අනුකූලව කටයුතු කළ යුතුයි. එසේ නොමැති වුණාම එම රටවලට එම සහනය අහිමි වෙනවා.“

055