(සිතුම් චතුරංග)

කරුණු කිහිපයක් මුලකරගනිමින් සහ විරෝධය දක්වමින් වවුනියාව හා යාපනය ගමනා ගමන මණ්ඩලයේ බස් රථ සේවකයෝ අද (28) බස් ධාවනයෙන් ඉවත්ව වැඩවර්ජනයක නිරතවූහ.

වවුනියාව ලංකා ගමනා ගමන මණ්ඩලයේ බස් රථ සේවකයින් පැවසූවේ වවුනියාව බස් නැවතුම්පොළ රජකාරි කටයුතු කළ සේවකයින් කිහිපදෙනකු පසුගියදා 17 වැනිදා දේශපාලන බලපෑම් මත ස්ථාන මාරුකිරීම් කිරීමට විරුද්ධව වැඩවර්ජනය සංවිධානය කළ බවයි.
එලෙස ස්ථානමාරු කරනු ලැබූ ලංගම නිලධාරීන් නැවතත් සේවයේ පිහිටුවන ලෙස ඔවුහු ඉල්ලා සිටියහ.

උතුරු පළාත් ශ‍්‍රී ලංකා ගමනා ගමන මණ්ඩලයේ ප‍්‍රාදේශීය කළමනාකරු ලෙස සේවය කරන නිලධාරීයාගේ අත්තනෝමතික ක‍්‍රියා කලාපයන්ට තමන් දැඩි ලෙස විරුද්ධ බව ද ඔවුහු පැවසූහ.

උතුරු පළාතේ මන්නාරම, මුලතිව්, කිලිනොච්චිය හා පේදුරුතුඩුව යන ලංගම ඩිපෝවන්ට අයත් බස්රථ සේවකයින් සුපුරුදු පරිදි බස්රථ ධාවනයේ නිරතව සිටි අතර ඔවුන් පවසා සිටියේ මෙම වැඩවර්ජනයට සහය දැක්වීමට තමන්වෙත නිසිලෙස දන්වා නොමැති බවයි.

මේ හේතුවෙන් මගීහූ විශාල පිරිසක් පීඩාවට පත්වූහ.