(විනීතා එම් ගමගේ)

වාලච්වේන කඩදාසි කම්හල වසර විස්සකට පමණ පසු යළි පණ ගැන්විණි.
 
1990 දශකයේ අගභාගයේ දී වසා දැමුුණු එම කම්හල ඉකුත් රජයේ කර්මාන්ත ඇමතිවරයා විසින් කැබිනට් පත‍්‍රිකාවක් ඉදිරිපත් කරමින් ඈවර කිරීමට ද කටයුතු යොදා තිබිණි.
 
මෙම කඩදාසි කර්මාන්ත ශාලාව සතු යන්ත‍්‍ර සූත‍්‍ර අබලි ද්‍රව්‍ය ලෙස සලකා යකඩ වශයෙන් විකුණා දැමීමටත් එම කැබිනට් පත‍්‍රිකාව මගින් ඉඩකඩ ලබා ගෙන තිබු  බව කර්මාන්ත හා සැපයුම් කළමනාකරණ අමාත්‍ය විමල් වීරවංශ මහතා එම කම්හලේ ප‍්‍රධාන යන්ත‍්‍රය මංගල මොහොතින් පණගැන්වීමෙන් පසු පැවැති මාධ්‍ය හමුවක් අමතමින් කියා සිටියේය.
 
එහෙත් එම යන්ත‍්‍ර සූත‍්‍ර මගින්ම යළි නිෂ්පාදනය ඇරඹූ බවත් මේ කම්හලේ නිපදවන කඩදාසි රටේ දරුවන් හා රාජ්‍ය සේවකයන් පරිහරණය කරන දිනය වැඩි ඈතක නොවෙන බවත් අමාත්‍යවරයා එහි දී පැවැසීය.
 
ගෝඨාභය රාජපක්ෂ මැතිතුමන්ගේ ‘සෞභාග්‍යයේ දැක්ම‘ ප‍්‍රතිපත්ති ප‍්‍රකාශනය අනුව යමින් යළි පණ දිය යුතු බව තීරණය කරනු ලැබූ බවත් ඉකුත් වසරේ ජනවාරි 15 වැනිදා පළමුවරට එම කර්මාන්ත ශාලාව නිරීක්ෂණයට පැමිණි අවස්ථාවේ ඊට යළි පණ දිය හැකි යැයි සිතෙන තත්වයක් නොතිබු බවත් හෙතෙම කියා සිටියේය.
 
ජාතික කඩදාසි සමාගමට පත් කරනු ලැබූ සභාපතිවරයා වූ විමල් රූපසිංහ මහතා ඇතු`ඵ අධ්‍යක්ෂ මණ්ඩලයේත්, දේශීය හා විදේශීය ඉංජිනේරුවන් කිිහිප දෙනෙකුගේත්, නාවික හමුදාවේ ඉංජිනේරු බලකායේ හා යුද හමුදාවේත් සුවිශාල දායකත්වය සමග කර්මාන්ත ශාලාවේ කඩදාසි නිපදවන ප‍්‍රධාන යන්ත‍්‍රය යළි පණ ගැන්වීමට හා එමගින් පරීක්ෂණ මට්ටමින් කඩදාසි නිෂ්පාදනය කිරීමටත් හැකියාව ලැබූ බව කී අමාත්‍යවරයා යන්ත‍්‍රයේ පවතින ඉතා සු`ඵ අඩුපාඩුකම් මග හරවා ගනිමින් 60 - 200 ජී එස් එම් අගයන්ගෙන් යුත් වාණිජ මට්ටමේ කඩදාසි හා බෝඞ් නිෂ්පාදනය කිරීමට නුදුරේම හැකියාව ලැබෙනු ඇතැයි ද කීය.

මහ මැතිවරණයෙන් පසුව එම ප‍්‍රධාන යන්ත‍්‍රය පමණක් නොව අනෙක් කඩදාසි නිෂ්පාදන යන්ත‍්‍රය ද පණ ගන්වා ගෙන මෙම කර්මාන්ත ශාලාව විවෘත කොට එමගින් පෙර පරිදි දේශීය වශයෙන් එහි නිපදවූ ෆයිල් කවර හා  ෆුල්ස්කැප් කොළ යළි ජනතාව අතට පත් කිරීමට හැකිවේවි යැයි විශ්වාස කරන බව ද අමාත්‍යවරයා කීය. 
 
කම්හල් පරිශ‍්‍රය සතු අක්කර 500 ක භූමිභාගය බහුවිධ සංවර්ධන ව්‍යාපෘති සහිතව සංවර්ධනය කිරීමට අදාළ කැබිනට් පත‍්‍රිකාවක් ද මේ වනවිට ඉදිරිපත් කරනු ලැබු ඇතැයි ද ඒ අනුව මහා භාණ්ඩාගාරයේ ඇපයක් සහිතව බැංකු මගින් ඉදිරියේදී රුපියල් මිලියන 800ක ණය මුදලක් මෙම ආයතනයට ලැබෙනු ඇති බවත් වීරවංශ මහතා සදහන් කළේය.
 
ඒ අනුව එකී බහුවිධ සංවර්ධන ව්‍යාපෘති ද ඇතුළත්ව සිදු කෙරෙන කටයුතු සමග ඉදිරි වසර කිහිපය තුළ ජාතික කඩදාසි සමාගම ලාභ ලබන ආයතනයක් බවට පත් කිරීමට හැකි බවට ද හෙතෙම විශ්වාසය පළ කළේය.
 
කම්හලට අවශ්‍ය විදුලිය සූර්ය බලශක්ති පැනල මගින් ලබා ගැනීමට අවශ්‍ය කටයුතු ද සැලසුම් කරමින් ඇතැයි ද ‘‘මර නින්දකට වැටි තිබුණු ’’ වාලච්චේන කඩදාසි කර්මාන්ත ශාලාව ගෝඨාභය රාජපක්ෂ ජනාධිපතිතුමන්ගේ සහ මහින්ද රාජපක්ෂ අගමැතිතුමන්ගේ හා වත්මන් ආණ්ඩුවේ බලාපොරොත්තු ඉටු කරමින් නැවත පණ ගැන්වෙන දිනය වැඩි ඈතක නොවෙන බව ද අමාත්‍යවරයා එහි දී කියා සිටියේය. 
 
1956 දී නැගෙනහිර ජර්මනියේ පරිත්‍යාගයක් මෙම කම්හල මෙරටට ලැබී තිබේ.
මෙම මාධ්‍ය හමුවට ජාතික කඩදාසි සමාගමේ සභාපති, විමල් රූපසිංහ, අමාත්‍ය උපදේශක සුදේශ් නන්දසිරි, අධ්‍යක්ෂ මණ්ඩල සාමාජිකා රුවනි සේනාරත්න, නාවික හමුදා ලූතිනන් ප‍්‍රියංක ජයසිරි යන මහත්ම මහත්මීහු ද එක්ව සිටියහ.